Hechos 15 - Porciones en Zapoteco de las Delicias

Dxin'lau'i gyu'u Jerusalén

¹ Dza ni', la'ke bënni gularooje Judea yajake Antioquía len gulazulau'e tuseed'de bënni bë'chi'ru ki ti gunn luláke xhki ti luchuuge rui'i ga'ldia' kieke ka naleeb'kde tuune bënni Judea, ka gnabe'e Moisés.

² Pablo len Bernabé guladil'tzke diidza len leke, len gdëëd ni, guluzua'ke lu naa'ke Pablo len Bernabé len ye la'ke bënni naar tzjake Jerusalén len labeki'xhbei'de le ni len bënni gbaaz kie' Xan'ru dzaag'ke bënni guul ki dxin'lau'i kieke bënni nayajle'ke le zua lu yëdz ni.

³ Gulusë'le'e leke bënni dxin'lau'i kieke bënni'a nayajle'ke Antioquía, len guladëëde lu yu ki Fenicia len lu yu ki Samaria len tagixhjë'ke ka tuune bënni ti nak'ke bënni Judea tuka'ane le tayajle'ke zia'a naar tzjak'leene Dios. Ati yugute'ke bënni bë'chi'ru tayëën'de diidza kub ni tudziiji'tzki'de.

⁴ Kati Pablo len Bernabé guladxiine Jerusalén, dxin'lau'i kieke bënni'a nayajle'ke nabëëz'ke leke dzaag'ke bënni gbaaz kie' Xan'ru len bënni guul tuzeajni'i'de, len gulagixhji'de leke yugute' le Dios chi beene len leke.

⁵ San la'ke fariseos bënni chi nayajle'ke, gulayas'ke len gulanake: —Run bayuudx kchuug'ru rui'i ga'ldia' kieke bënni'a chi gulayajle'ke len ti nak'ke bënni Judea, len gnabe'ik'ru'ne ki luune le rna xhba kie' Moisés.

⁶ Na' guludzaage bënni gbaaz kie' Xan'ru len bënni guul tuzeajni'i'de naar labeki'xhbei'de le ni.

⁷ Gdëëd glui'ke diidza zian, Pedro gzui'de len gudxe leke: —Bë'cha'a, lbi'ili nëëzi'kz'li ki Dios grëe' neda zia'at naar kixhji'kda'ne diidza kub dxia'a ni bënni ti nak'ke bënni Judea, naar layajle'ke.

⁸ Ati Dios numbe'e ikj'laadxi'dau'ke len gxhi'e leke, lena'a psë'le'e Bë' La'ay kie' kieke ka na' psë'le'e Le' kieeru.

⁹ Dios ti rbiaj'je'ide leke, koma lekz'ka' chi bupe'e ikj'laadxi'dau'ke nia'a ki yëla rajle' kieke len Jesús.

¹⁰ Na'a ¿Bixhkia' rzua'zaka'li lau'e Dios, len rdxia'li ikj'lau'ke bënni tayajle'ke ni yua' zi'i le ti rzaki'ru gun'ru, len le ti gulazaki'de lekz'ka' xuuz'xhtau'ru guul lun'ke?

¹¹ San ro'u rajle'ru ki lu yëla rak'len kie' Xan'ru Jesús nude'la'ru, len lekz'ka' leke.

¹² Yugute'ke gulabë'ke dxiiz len guluzenaage tzal Bernabé len Pablo tagixhjë'ke le tunn'be' yëla wak xhën le Dios beene lu naa'ke len bënni'a ti nak'ke bënni Judea.

¹³ Kati buudx glui'ke diidza, Santiago gne': —Bënni bë'cha'a guluzenaagi neda:

¹⁴ Simón chi gdixhji'de ro'u ka beene Dios zia'a kati guk'leene bënni ti nak'ke bënni Judea, len grëe' leke lekz'ka' ki lak'ke bënni yëdz kie'.

¹⁵ Le ni guk ni rajtzaag len le guluzooje bënni glui'ke diidza ulaaz kie' Dios, ka rna Diidza La'ay:

¹⁶ “Na' tëëd le ni, wëëda len yuchisa liidxe David lea nagin'j; uuna gap nagin'j len yuchisa ley le yubl,

¹⁷ naar lugiilje Xan'ru bënni'a ye la'ke len lekz'ka' yugute' yëdz le chi grëa' ki laki kia'.

¹⁸ Xan'ru, gdixhji'de ro'u le ni zia'at nazi'lu'ne'e guune ley.”

¹⁹ »Lena'a, ruuni neda, ki ti rala jguak'ru'ne yua' zi'i le ti run bayuudx bënni'a ti nak'ke bënni Judea, len tuka'ane le tayajle'ke zia'at, len tubi'i'laadxi'ke len Dios.

²⁰ Le rala'z gzoj'ru kieke nak ki ti la'we le chi nunëëdzj'ke ki budou', len ti tzajtzu'u'leen'ke nu ku zua'leen'ke, len ti la'we xhpeelak'ba bua' gixi bua' ti nabiaj'ke'ba rën, len ti la'we rën.

²¹ Koma dza niit nakua'ke tu tu yëdz bënni tagixhjë'ke le rna lu xhba kie' Moisés, len tza tza Tu'ueak'laadxi'ke Bënni Judea tul'e ley lu yu'u useed.

Gich le gulusë'le'e kieke bënni nayajle'ke len ti nak'ke bënni Judea

²² Bënni gbaaz kie' Xan'ru len bënni guul tuzeajni'i'de, len yugute'ke bënni dxin'lau'i kieke bënni'a nayajle'ke, gluune diidza labë'ke ladj'ke'a la'ke bënni lusë'le'e Antioquía dzaag'ke Pablo len Bernabé. Guluzua'ke Judas bënni le' lekz'ka' Barsabás, len Silas, bënni ni nak'ke bënni blou ladj'ke bënni'a nayajle'ke,

²³ len leke gulusë'le'e gich le rna ki: «Netu bënni gbaaz kie' Xan'ru dzaag'tu'ne bënni guul tuzeajni'i'de, rliidz'tzawi'tu lbi'ili bë'cha'a tzka'li zuaali Antioquía, Siria len Cilicia len ti nak'li bënni Judea.

²⁴ Chi gnëëzi'tu ki la'ke bënni netu ti nusë'lak'tu'ne gularooje ni, len gulutza'a'ke ikj'li len gulunchixhi'de ikj'lau'li len le tuseed'de.

²⁵ Lena'a, ben'tu diidza dzaag këk'tu'ne ladj'tu ni la'ke bënni dujyu'ke lbi'ili len liid'leene Pablo len Bernabé, bënni'a raki'tzkik'tu'ne,

²⁶ leke chi nun'gu'unk'de yëla naban kieke nia'a kie' Xan'ru Jesucristo.

²⁷ Na'a rsë'lak'tu'ne Judas len Silas leke lui'leene lbi'ili diidza kuin'kz'li naar lagixhji'de lbi'ili le ni.

²⁸ Koma chi grë'xhbei'tu len le' Bë' La'ay kie' Dios ki tirbi yua' zi'i jgua'tu lbi'ili, le niiz nak le rnaab'tu:

²⁹ ki ti gaag'li xhpeela'ba bua' gixi chi nunëëdzj'ke'ba ki budou', ti gaag'li xhpeelak'ba bua' gixi bua' ti nabiaj'ke'ba rën, ti gaag'li rën, len ti tzajtzu'u'leen'li nu ku zua'leen'li. Xhki udxiini'li gun'li le ni, gun'li le dxia'a. Dip'laadxi'li.»

³⁰ Na' leke, gularooje len kati guladxiine Antioquía, gulutzaage dxin'lau'i kieke bënni'a nayajle'ke len gulunëëdzje gich'a.

³¹ Kati bënni bë'chi'ru glul'e gich ni, guludziiji'tzki'de koma ruwi'xhën leke.

³² Ati Judas len Silas lekz'ka' tui'ke diidza ulaaz kie' Dios, len guluwi'xhëëne leke len gulutip'laadxi'tzke bënni bë'chi'ru len xhtiidza'ke.

³³ Kati gdëëd tson tap dza, bënni bë'chi'ru'a guluzei'de leke diidza len yëla rë'dxi, naar ludxiine len bënni'a gulusë'le'e leke.

³⁴ [Ati Silas gna kie' jga'ane ni'.]

³⁵ Ati Pablo len Bernabé gulaga'ane Antioquía, len dzaag'ke bënni zian, yajak'leene tuseed'de bunach len tagixhjë'ke diidza kub dxia'a kie' Xan'ru.

Pablo len Bernabé tu'la'a lza'a'ke

³⁶ Gdëëd ye lati dza, Pablo gudxe Bernabé: —Dia' tzajyuk'ru'ne le yubl bënni bë'chi'ru yugu yëdz ga chi yajtixhjë'ru xhtiidze'e Xan'ru, naar gle'i'ru nakxh nakua'ke.

³⁷ Bernabé gu'un'de kche'e Juan, Bënni'a te'e le' lekz'ka' Marcos;

³⁸ ati Pablo ti bdzag'laadxe'e luche'ke le', koma Marcos pka'ane leke Panfilia len tir gyaj'leene leke luune dxin ni.

³⁹ Tzka'ti'ga guladil'e diidza len ti bdzaag kieke, gulula'a lza'a'ke: Bernabé pche'e Marcos len gulagie'le'e barku zga yëdz Chipre,

⁴⁰ tzal'za Pablo pche'e Silas, len bënni bë'chi'ru gulagu'e le' lu yëla rak'len kie' Dios, len brooje ni'

⁴¹ len gdëëde yëdz ki Siria len Cilicia rtipe'laadxi'i dxin'lau'i kieke bënni'a tayajle'ke.