Hechos 11 - Porciones en Zapoteco de las Delicias

Pedro rgixhjë'e lu dxin'lau'i kieke bënni'a nayajle'ke Jerusalén le guk

¹ Bënni gbaaz kie' Xan'ru len bënni bë'chi'ru nakua'ke Judea gulayëën'de diidza'a ki lekz'ka' bënni'a ti nak'ke bënni Judea gulazi'ke xhtiidze'e Dios.

² Ati kati Pedro budxiine Jerusalén guladil'leene le' bënni'a tayajle'ke Xan'ru len tanáke ki yugute'ke rala luchuuge rui'i ga'ldia' kieke.

³ Len gulunaab'de le': —¿Bixhkia' yajyu'ku'ne bënni'a ti nak'ke bënni Judea len ti nuchuug'ke rui'i ga'ldia' kieke ati gdaagu'leen'ku'ne?

⁴ Ati Pedro gzulau'e gdixhji'de leke yugute' ka'teez guk. Gudxe leke:

⁵ —Neda zua' lu yëdz Jope, len tzal rui'leena'ne diidza Dios, le' blui'de neda: Ati ble'i'da le nak ka tu laari xhën, le naaga' gdap la'a len za' rdinn lu xhba len rdxin'te ga neda zua'.

⁶ Byua' dxia'a naar gle'i'da bixh yu'u le'i ati ble'i'kda'ba bua' gixi gza'a, bua' taze'i'ba gdap ni'ak'ba, bua' gixi znia', bua' ta'ij le'ek'ba, len bua' tazuuba.

⁷ Len byëën'da tu chi'i le gudx neda: “Gyas, Pedro; bdëëdik'ba len gdaag'ba.”

⁸ Neda bubi'a diidza: “Ti gak, Xan; neda gat'ga ra'wi'kz'da le ku rala ga'wa len le ku nak dxia'a.”

⁹ Na' chi'i ni bliidz neda le yubl, len gna: “Le Dios chi bupe'e, ti gunn gnou' ki ti naba'a.”

¹⁰ Tson lzu guk ki, chi nak ka' yugute' buben lu xhba.

¹¹ Na'teez guladxiine nu'yu'u ga zua'tu'a tsone' bënni za'ke yëdz't Cesarea tugiilje neda.

¹² Le' Bë' La'ay kie' Dios gnabe'i'de neda tziaj'leen'ka'ne len ti guuni'z neda. Len lekz'ka' gulaza'leen'ke neda xope bënni bë'chi'ru ki gdou' Jope. Ati yugute'tu gyaaz'tu liidxe bënni'a,

¹³ len le' gdixhji'de netu ka guk ble'i'de tue' gbaaz la'ay kie' Dios liidxe, len ze' lau'e len gudxe le': “Psë'la'ke lu yëdz Jope bënni tzajxi'ke tue' bënni le' Simón, bënni le' lekz'ka' Pedro;

¹⁴ le' kixhji'de li' nakxh gak yulou', len luláke lekz'ka' bënni nakua'ke liidxu.”

¹⁵ Kati gzulau'a rui'leen'ka'ne diidza, le' Bë' La'ay kie' Dios dusue len leke, ka'teez guk kati dusue len ro'u zia'a.

¹⁶ Na' gyajnei'da le gne' Xan'ru: “Koma Juan pkiile bunach len nis, san Dios jkiile lbi'ili len Bë' La'ay kie'.”

¹⁷ Na'a xhki Dios rnëëdzje kieke larakz le chi benne kieeru tzka'ru chi gyajle'ru'ne Xan'ru Jesucristo, ¿Nuxh naka neda yudabaaga'a lau'e Dios?

¹⁸ Kati bënni bë'chi'ru nakua'ke Jerusalén gulayëën'de le ni, guluzuadxi'ke len gulagu'e ba Dios, tanáke: —¡Dios rnëëdzje latj lekz'ka' kieke bënni ti nak'ke bënni Judea lubi'i'laadxi'ke len lazi'ke yëla naban tzalzu!

Bënni gdou' Antioquía

¹⁹ Kati gdëëd guludëëd'de Esteban, gulazulau'ke tulaage bënni tayajle'ke Xan'ru, lena'a la'ke gulaxhunj'ke yëdz Fenicia, Chipre len Antioquía. Ni' gulazulau'ke tagixhjë'ke diidza kub dxia'a kie' Xan'ru kie'z'ke bënni'a nak'ke bënni Judea.

²⁰ San la'ke bënni tayajle'ke Xan'ru, bënni yëdz Chipre len bënni yëdz Cirene guladxiine Antioquía len gui'leene diidza bënni'a ti nak'ke bënni Judea, len gulagixhji'de leke diidza kub dxia'a kie' Jesús, le' Xan'ru.

²¹ Len yëla wak kie' Xan'ru gzua len leke, ati ka' zian'ke guluka'ane yugu le tayajle'ke len gulayajle'ke len Xan'ru.

²² Bënni gdou' Jerusalén, kati gulanëëz'de le ni, gulusë'le'e Bernabé lu yëdz Antioquía.

²³ Kati Bernabé bdxiine ble'i'de ka Dios ben'la'aye leke, len budziiji'tzki'de. Len be'leene leke diidza naar lakua'ke tzutzu gdu ikj'laadxi'dau'ke lu nëëz kie' Xan'ru.

²⁴ Koma Bernabé nake bënni tzawi len gdu laadxe'e rajle'e len nudze'iz'de le' Bë' La'ay kie' Dios. Ati bënni zian gulayajle'tzke Xan'ru.

²⁵ Gdëëd ni, Bernabé gyiije yëdz Tarso yajdiilje Saulo,

²⁶ len kati budzëël'de le', pche'e le' yëdz Antioquía. Ni' gulakua'ke gdu tu iz, len guluseed'de zian bunach. Guk lu yëdz Antioquía ni ga gulusi'ke lake bënni useed kie' Xan'ru, bënni da'ke Cristo.

²⁷ La dza niiz, gularooje Jerusalén la'ke bënni tui'ke diidza ulaaz kie' Dios len yajake Antioquía.

²⁸ Len tue' bënni le' Agabo gzui'de len le' Bë' La'ay kie' Dios gdixhji'de le' len gne' ki uyu'u tu gbin xhën gdu yëdz'lyu, len guk ka', kati gzue' bënni rnabe' le' Claudio.

²⁹ Na' bënni tayajle'ke Xan'ru ki yëdz Antioquía gza' ikj'laadxi'dau'ke lak'leene bënni bë'chi'ru nakua'ke Judea, len tzka ledu de kieke tu tu'ke.

³⁰ Ka' gluune, len guluzua'ke lu naa'ke Bernabé len Saulo lugua'ke gun ni kieke bënni guul tuzeajni'i'de Judea.