Hechos 10 - Porciones en Zapoteco de las Delicias

Pedro len Cornelio

¹ Gzue' lu yëdz Cesarea tue' bënni le' Cornelio bënni nake xan'ke bënni rajake gdil bënni nazi' lake bënni Italia.

² Nake tue' bënni raadxi'de Dios len riijilaadxe'e Le' len yugute'ke bënni'a nakua'ke liidxe, len lekz'ka' dumi zian rnëëdzje kieke bënni yechi, len rui'leen'tekze diidza Dios.

³ Tu dza, gdëëd xhwë, Dios blui'de le': Ati ble'i'de tue' gbaaz la'ay kie' Dios gyaazie ga zue' len gudxe le': «¡Cornelio!»

⁴ Cornelio byue' gbaaz la'ay ni, len yëla raadxi bnaab'de le': «¿Bixh rala gnou' xan?» Le' gbaaz la'ay ni gudxe le': «Dios ryëën'de li' kati rui'leenu'ne diidza, len nëëz'de le ruunu rak'leen'ku'ne bënni nayaadzji'kde.

⁵ Psë'la'ke lu yëdz Jope bënni tzajxi'ke tue' bënni le' Simón, bënni le' lekz'ka' Pedro.

⁶ Le' naga'ane liidxe bënni le' Simón lekz'ka', bënni rpe'e gid kieeba beedx len zue' ga'la ra nis xhën.»

⁷ Kati buze'e gbaaz la'ay kie' Dios rui'leene le' diidza, Cornelio bliidze chope' bënni wendxin kie' len tue' bënni riije gdil len riijilaadxe'e Dios, bënni le' rxhënilaadxe'e,

⁸ len buudx gdixhji'de leke psë'le'e leke yëdz Jope.

⁹ Bueikj dza'a, gdu lau'i dza'a, tzal dzë'ë'ke nëëz zjake yëdz Jope, Pedro greene ikju'ul zaje'leene diidza Dios.

¹⁰ Gzulau rduune len re'en'de ga'we, ati tzal tuune kie' xhwë, Dios blui'de le':

¹¹ ati ble'i'de byaalj lu xhba len za' rdinn le nak ka tu laari xhën, le naaga' gdap la'a.

¹² Lu laari xhën ni dzë'ë'ba bua' gixi gza'a, bua' taze'i'ba gdap ni'ak'ba, bua' ta'ij le'ek'ba, len bua' tazuuba.

¹³ Len byëën'de tu chi'i le gudx le': «Gyas, Pedro; bdëëdi'ba len gdaag'ba.»

¹⁴ Pedro bubi'e diidza: «Ti gak, Xan; neda gat'ga ra'wi'kz'da le ku rala ga'wa len le ku nak dxia'a.»

¹⁵ Chi'i ni bliidz le' le yubl, len gna: «Le Dios chi bupe'e, ti gunn gnou' ki ti naba'a.»

¹⁶ Tson lzu guk ki, chi nak ka' laari xhën ni buben lu xhba.

¹⁷ Pedro rë'e bagi'i bixh re'e'ni gna lea ble'i'de'a, kati guladxiine bënni'a nusë'le'e Cornelio, len tugiilje gaxh zua liidxe Simón.

¹⁸ Kati guladxiine'a, gulunaabe xhki na' zue' tue' bënni le' Simón bënni le' lekz'ka' Pedro.

¹⁹ Len tzal Pedro rë'e bagi'i lea blui'de le' Dios, le' Bë' La'ay kie' Dios gudxe le': «Yajyu tsone' bënni tugiilje li'.

²⁰ Gyas, budinn len gyaj'leen'ke ti guuni'z li', koma neda nusë'la'ka'ne.»

²¹ Pedro budinie len gudxe bënni'a: —Needa'a rugiilj'li; ¿Bixhkia' za'li?

²² Leke gulubi'i'ke diidza: —Za'tu ulaaz kie' Cornelio bënni nake xan'ke bënni rajake gdil, tue' bënni dxia'a len riijilaadxe'e Dios, len yugute'ke bënni Judea taki'de le' len nadxi'ik'de le'. Ati tue' gbaaz la'ay kie' Dios gudxe le' ki ksë'le'e nu dujxi' li' naar tziiju liidxe len gzenaage le rala gie'u'ne.

²³ Na' Pedro bdëëde leke nu'yu'u, len gulaga'an'leene le' chi'dzë'ël'a. Bueikj dza'a, Pedro gyaj'leene leke, len la'ke bënni bë'chi'ru nakua'ke Jope yajak'leene le'.

²⁴ Len bueikj dza'a guladxiine Cesarea, ga zue' Cornelio rbëëze leke dzaage bënni bë'chi' lze'e len bënni rdzaage dxia'a, bënni le' nuliidze.

²⁵ Kati Pedro bdxiine liidxe'a. Cornelio brooje zajxi'e le', len bzechu xhiibe lau'e len gyiijilaadxe'e le'.

²⁶ Ati Pedro pchise le', len gudxe le': —Gzui, koma neda lekz'ka' naka bënni bunach, ka li'.

²⁷ Tzal rui'leene le' diidza, gyaazie len ble'i'de ki bunach zian nudzaag'ke na'.

²⁸ Pedro gudxe leke: —Lbi'ili nëëzi'li ki tue' bënni Judea ti de lsenz lu xhba kie' Dios gdzaage bënni yëdz yubl len tzaazie liidx'ke. San Dios chi pseed'de neda ki ti rala gnia' ki bunach ti nak'ke bënni dxia'a.

²⁹ Lena'a, ka gulagixhji'de neda za'a len ti budabaaga'a. Na'a re'en'da gnëëz'da, bixhkia' bliidz'li neda.

³⁰ Cornelio bubi'e diidza: —Chi guk tap dza, lez gdu ka na'a, neda zua liidxa ni, len ka chi naleebi'ru rui'leena'ne diidza Dios gdëëd xhwë, kati blui'lau'e tue' bënni nakue' xhe' le rep'yës'lni'.

³¹ Len gudxe neda: “Cornelio, Dios ryëën'de li' kati rui'leenu'ne diidza, len nëëz'de le ruunu rak'leen'ku'ne bënni nayaadzji'kde.

³² Psë'la'ke lu yëdz Jope bënni tzajxi'ke tue' bënni le' Simón, bënni le' lekz'ka' Pedro. Le' naga'ane liidxe bënni le' Simón lekz'ka', bënni rpe'e gid kieeba beedx len zue' ga'la ra nis xhën.”

³³ Lena'a psë'la'te'ka'ne bënni dudiilj'ke li', len dxia'a beenu zo'u. Na'a chi zuaaru ni yugute'tu lau'e Dios, len re'eni'tu gzenaag'tu dera le gnabe'i'de li' Xan'ru gie'u netu.

Diidza le be'e Pedro liidxe Cornelio

³⁴ Pedro gzulau'e rue'e diidza len gne': —Na'a rajni'i'da ki leel Dios ti rbiaj'je'ide tu tu bunach,

³⁵ san gdu'te yëdz'lyu Le' ryaazlaadxe'e bënni riijilaadxe'e Le' len ruune le nak dxia'a.

³⁶ Dios be'leene diidza bënni xi'in'xhzue' Israel, len gdixhji'de leke diidza kub dxia'a ki yëla rë'dxi le za' lu ne'e Jesucristo bënni nake Xan'ru yugute'ru.

³⁷ Lbi'ili nëëzi'li dxia'a le guk gdu yu kieke bënni Judea, le gzulau lu yu Galilea, kati Juan gdëëd gdixhji'de bunach ki rala ludiile nis.

³⁸ Nëëzi'li ki Jesús ki Nazaret bdze'iz'de le' Bë' La'ay kie' Dios len yëla wak kie' gzua len le', ati Jesús gde' beene le nak dxia'a len buune yugute'ke bënni tutzaage lu ne'e bënni xëwi. Len le ni beene koma Dios gzue' len Le',

³⁹ len netu rdujxaka'lau'tu yugute' le beene Jesús lu yu Judea len Jerusalén. Gdëëd ni guludëëd'de Le', len gulude'e Le' lu yaag kruuz.

⁴⁰ San kati guk tson dza Dios buspaane le' lu yëla gut, len beene ga blui'lau'e len netu.

⁴¹ Len ti blui'lau'e gdu yëdz, lau'tu netu'z blui'lau'e, bënni'a Dios grëe' zia'at ki lujxaka'lau'ke. Netu gwi'i'gdaagu'leen'tu'ne kati gdëëd bubaane lu yëla gut.

⁴² Len Le' psë'le'e netu kixhji'tu yëdz ki Dios chi bzue' Le' ki kueki'xhbei'de kieke bënni ban len kieke bënni nat.

⁴³ Yugute'ke bënni glui'ke diidza ulaaz kie' Dios glui'ke diidza kie' Jesús, len gulagixhjë'e ki bënni tayajle'ke le' tazi'ke lu ne'e Le' yëla rzi'xhën ki xhtu'la'ke.

Bënni ti nak'ke bënni Judea tazi'ke Bë' La'ay kie' Dios

⁴⁴ Ni zue' rue'e diidza Pedro, kati Bë' La'ay kie' Dios dusue len yugute'ke bënni'a tuzenaage diidza'a.

⁴⁵ Ati bënni Judea zak'leene le' Pedro len tayajle'ke Xan'ru, gulubaan'de ki bënni'a ti nak'ke bënni Judea gulazi'ke Bë' La'ay kie' Dios,

⁴⁶ koma gulayëën'de tui'ke diidza yubl len tagu'u'ke ba Dios.

⁴⁷ Na' Pedro gne': —¿Naru gunn gzaaga'ru ku ludiile nis bënni ni, xhki leke chi gulazi'ke Bë' La'ay kie' Dios, ka ro'u chi gxhi'ru'ne?

⁴⁸ Len gnabe'e ki ludiile nis lu le' Jesucristo. Len gdëëd ni glatayui'de Pedro jga'an'leene leke ye chop tson dza.