Hechos 1 - Porciones en Zapoteco de las Delicias

Dios pxënelaadxi'ke ksë'le'e Bë' La'ay kie'

¹ Teófilo lu gich le beena zia'a bzooja yugute' le Jesús gzulau'e ruune len rseed'de

² na' bdxin'te dza bubeene yewayuba. Kati zia'a wëëje, len Bë' La'ay kie' Dios gnabe'i'de gbaaz kie' bënni'a grëe' le rala lun'ke.

³ Len kati gdëëd gutie' kuin'kze yajlui'lau'e len blui'de leke le tunn'be' ki yu'u yëla naban kie'. Chua' dza blui'lau'e len leke len be'leene leke diidza ki yëla rnabe' kie' Dios.

⁴ Kati ni zue' len bënni gbaaz kie', Jesús ti gu'un'de luze'e Jerusalén len gudxe leke: —Gulkëëz gak le pxënelaadxi'li Xuuza ka neda chik'z guudxa lbi'ili.

⁵ Koma Juan pkiile bunach len nis, san tir rdzei zian dza kati Dios jkiile lbi'ili len Bë' La'ay kie'.

Jesús rubeene yewayuba

⁶ Bënni nakua'leene Jesús gulunaab'de le': —Xan, ¿Ati gun'tiu' na'a ga luzi'ke yëla rnabe' bënni Israel?

⁷ Jesús bubi'e diidza: —Ti rné lbi'ili gnëëzi'li bixh dza u batxh'tek guune Dios le zua lu ne'e guune.

⁸ San kati si'li'ne Bë' La'ay kie' Dios, wap'li yëla wak len uroj'li tzajxaka'lau'li nia'a kia' lu yëdz Jerusalén, gdu yu ki Judea len yu ki Samaria len gdu gabi'i yëdz'lyu.

⁹ Buudx gne' ki, tzal nakua'ke tuyu'ke le', Jesús bubeene ati tu buaj pka'chi' le', len tir gulale'i'de le'.

¹⁰ Len tzal tuyu'ke ka rubeene Jesús yewayuba, chop'ke bënni naku'ke laari xhkich gulului'lau'ke ga nakua'ke'a

¹¹ len gle'ke leke: —Bënni Galilea, ¿Bixhkia' zeeli ryuuli lu xhba? Larakz Jesús ni bënni'a gzue' len lbi'ili ati na'a chi bubeene yewayuba, wëëde le yubl lekz'ka' ka na' ble'i'li'ne zuwëëje.

Matías buzue' xhlatje Judas

¹² Na' lati'iz guluza'ke Gia'a ki Olivos len guludxiine Jerusalén tzkaaz nap'ke lsenz laza'ke dza tu'ueak'laadxi'ke bënni Judea.

¹³ Kati guludxiine lu yëdz'a gulabeene yu'u zua xhtza' ki yu'u ga taga'ane'a. Bënni ni nak'ke Pedro, Juan, Santiago, Andrés, Felipe, Tomás, Bartolomé, Mateo, Santiago bënni xi'ine Alfeo, Simón bënni'a nadxi'i'de laadze, len Judas bënni xi'ine Santiago.

¹⁴ Yugute'ke bënni ni tudzaag'tekze tui'leene diidza Dios, len ye la'knu nguul lekz'ka' María xhne'e Jesús len bënni bë'che'e.

¹⁵ Larakz dza niiz ka tu'gayua'galj'ke bënni'a nudzaag'ke ni', ati Pedro gzui'de len gudxe leke:

¹⁶ «Bënni bë'cha'a, ben bayuudx guk le gne' Bë' La'ay kie' Dios lu Diidza La'ay bzooje David kie' Judas, bënni'a pche'e bënni'a gulazëëne Jesús.

¹⁷ Koma bitze'e len ro'u len tza'xhën ben'ru dxin.

¹⁸ Ati len laaxhji xhtu'le'e gyiije len gu'uwe tu yu, na' gbixe kus'wiidjl ati brëëza le'e len gularoj xhajlue'.

¹⁹ Kati gulanëëz'de bënni nakua'ke Jerusalén gulusi'ke lei' yu ni Hacéldama, diidza ni re'e'ni gna: “Yu Rën”

²⁰ Len ka' nayoj lu Gich ki Salmo rna: “Liidxe nit'lau len nutunu sua le'i.” Lekz'ka' rna: “Bënni yubl sue' xhlatje.”

²¹ »Nakua'ke ni bënni chi gulakua'leen'tekze ro'u gdu tzka gzue' len ro'u Xan'ru Jesús,

²² le gde'la' kati Juan pkiile le' nis len bdxin'te dza bubeene yewayuba. Na'a run bayuudx uzua'ru'ne bënni sue' len netu ki nadzaag'tu ka' tzajxaka'lau'tu ki Jesús bubaane lu yëla gut.»

²³ Na' guluzua'ke chope': José bënni le' Barsabás ati te'ke le' Justo len Matías.

²⁴ Ati glui'leene diidza Dios gle'ke Le': «Xan, li' numbe'u laadxi'dau'ke yugute'ke, blui'i netu nuxh'lke rdzag'laadxu'ne

²⁵ naar gake gbaaz kiu' xhlatje Judas le bnitie' nia'a ki xhtu'le'e len ziije ga rné le' tziije.»

²⁶ Na' guluzooje lu giaj lake ati guluzale' len broj le' Matías len na'teez gbaab'leene bënni ye chi'niaj'ke gbaaz kie' Jesús.