Filemón 1 - Porciones en Zapoteco de las Delicias

Pablo rliidz'tzawi'e Filemón

¹ Neda Pablo nadzuuna liidx'gia, nia'a kie' Cristo Jesús, dzaaga'bi bi bë'chi'ru Timoteo rliidz'tzawi'tu li' Filemón bënni nadxi'i'tu len run'ru dxin tuuz,

² lekz'ka' rliidz'tzawik'tu'ne bënni tayajle'ke Le' Cristo tudzaage liidxu, nguul zan'ru Apia len Arquipo, bënni lza'a'tu lu dxin kie' Xan'ru.

³ Xuuz'ru Dios len Xan'ru Jesucristo uzalaadxe'e kieeli yëla rak'len kie' len yëla rë'dxi.

Yëla dexhken len yëla ratayu

⁴ Kati rui'leena'ne diidza Dios rajnei'da li' len rui'a'ne yëla dexhken,

⁵ ka nak le ryëën'da ki yëla nadxi'i kiu' len yëla rajle' kiu' le rlui'o len Xan'ru Jesús len lekz'ka' len yugute'ke bënni nakik'de ki yëdz la'ay.

⁶ Len rnaab'da'ne Dios ki le li' ruunu lu yëla rajle' kiu' kche' li' umbe'u gdu'te le dxia'a le gunn gun'ru lu yëla nadxi'i kieeru Le' Cristo.

⁷ Rudziiji'tzki'da len rtip laadxa'a ki yëla nadxi'i kiu', koma li' bë'cha'a bui'xhëënu laadxi'dau'ke bënni nakik'de ki yëdz la'ay.

Pablo ratayue' kie' Onésimo

⁸ Lena'a, zala napa lsenz lu Le' Cristo gnabe'i'da li' le rala guunu,

⁹ ratayuil'da li' lu yëla nadxi'i. Neda Pablo, chi naka bënni guul, len na'a nadzuuna liidx gia nia'a kie' Le' Cristo Jesús,

¹⁰ rnaab'da li' gak'leenu'ne Onésimo, le naka ka xuuze lu yëla rajle' Dios lu liidx'gia ni.

¹¹ Zia'a Onésimo ti lzaki'de, na'a chi zaki'de kieeru grop'ru.

¹² Na'a rusë'la'ne kiu', zala ti rdzaan'da'ne.

¹³ La bikida jga'an'leene neda niiz, naar gak'leene neda ulaaz kiu' tzal nadzuuna liidx'gia nia'a ki diidza la'ay.

¹⁴ Ti re'en'da bi guuna xhki li' ti gunnu lsenz, naar klen le guunu kia' ti nak le gdayë'li'da li', re'en'da guunu gdu laadxu'u.

¹⁵ Naxhka Onésimo pka'ane li' tuchi'i naar jga'an'leene li' tzalzu,

¹⁶ tir gake ka bënni nado'u'e, gake ka bënni bë'chu'u nadxi'i'du, neda nadxi'i'tzki'da'ne, li' rala gdxi'ir'du'ne keg ka nadxi'iz lza'a'ru ro'u bunach lekz'ka' ka bënni bë'chu'u lu yëla rajle' len Xan'ru.

¹⁷ Xhki ba rak'du neda ka bënni bë'chu'u lu yëla rajle', gxhi'e ka'kz ka rzi'u neda.

¹⁸ Xhki bi psake'e li' le ku nak, xhki bi rale'e kiu', pkiixhj neda.

¹⁹ Neda Pablo rzooja le ni rnia' ni, neda ugiixhja, zala gunn'kz gnia' kiixhju li', koma li' rala'kzu kia' yëla naban kiu'.

²⁰ Ka nak bë'cha'a rnaab'da li' guunu kia' klen lu yëla nadxi'i kiu' Xan'ru; bui'xhën laadxi'dau'a le rak bë'chi'ru len Cristo.

²¹ Rzooja kiu' le nëëz'da rzenaagu, len nëëz'da ki guunu ye lati'r ka nak le rnaab'da.

²² Len lekz'ka' bpa'a ga gdxiina, rbëëza Dios gunne latj duyua' lbi'ili, ka rnaabi'li'ne Dios.

Rzeide diidza

²³ Epafras bënni dzaaga'ne liidx'gia ni, nia'a kie' Cristo Jesús, rgape Dios lbi'ili,

²⁴ len lekz'ka' le' Marcos, Aristarco, Demas len Lucas bënni tak'leene neda lu dxin.

²⁵ Yëla rak'len kie' Xan'ru Jesucristo sua len lbi'ili.