زبور 85 - Pakistani Yousafzai Pashto

پينځۀ اتيايم زبور د برکت دپاره دعا

د موسيقۍ د مشر دپاره: د قورح د زامنو يو زبور

¹ اے مالِکه خُدايه، تا خپل برکت په خپل مُلک باندې وکړو، او تا دوباره د يعقوب خوش قسمتى بحال کړه.

² تا د خپلو خلقو خطاګانې معاف کړې، تا د هغوئ په ټولو ګناهونه پرده واچوله.

³ تا خپله غصه په خپل ځان تيره کړه، تا د خپل قهر لمبه په خپله باندې سړه کړه.

⁴ اے مالِکه خُدايه، اے زمونږه خلاصوونکيه، مونږه په خپل ځائ کړه خپل خفګان زمونږ نه لرې کړه،

⁵ تۀ به ټول عُمر زمونږ نه خفه يې څۀ؟ تۀ خپل خفګان نسل در نسل ساتې څۀ؟

⁶ ولې تۀ‎‎‎‎‎‎ به دوباره مونږه تازه نۀ کړې څۀ‎‎‎؟ چې ستا خلق په تا کښې خوشحالى وکړى.

⁷ اے مالِکه خُدايه، مونږ ته خپله ابدى مينه وښايه، مونږه له خپل خلاصون راکړه،

⁸ زۀ به مالِک خُدائ، خُدائ پاک ته غوږ ونيسم. ځکه چې هغه به د خپل قوم، خپلو مقدسينو ته وکړى د خير خبره. خو دوئ دوباره خپل کم عقلتوب ته مۀ پرېږده.

⁹ بې‌شکه چې څوک د خُدائ نه يريږى د هغۀ خلاصون هغۀ ته نزدې دے، نو دغه شان به د هغۀ جلال زمونږ په خاوره کښې اوسيږى.

¹⁰ ابدى مينه او وفادارى به دواړه خپلو کښې ترغاړه شى، سلامتى او صداقت به يو بل ښُکلوى.

¹¹ وفادارى د زمکې نه راپورته کيږى، صداقت بره د آسمان نه لاندې راګورى.

¹² بې‌شکه مالِک خُدائ به ښۀ څيزونه مونږ له راکوى، او زمونږ زمکه به ښۀ فصل پېدا کوى.

¹³ صداقت د هغۀ په وړاندې روان وى، او د هغۀ د قدمونو دپاره لار تياروى.