زبور 8 - Pakistani Yousafzai Pashto

اتم زبور د خُدائ پاک جلال

د سرود مشر دپاره: د رباب ساز سره د حضرت داؤد يو زبور

¹ اے مالِکه خُدايه، زمونږ ربه، ټوله دُنيا کښې ستا نوم عظيم ‎‎دے، پاس په آسمانونو کښې ‎دې خپل جلال جوړ کړے دے.

² تا تى رودونکو او لويو ماشومانو ته خپل ثناء صِفت ښودلے دے خپل مخالفين او دشمنان دې په دې چپ کړى دى.

³ زۀ کله چې ستا د ګوتو کار ته ګورم، ستا په آسمانونو باندې غور کوم، په خپل ځائ چې مقرر دى ستورو سپوږمۍ ته ګورم،

⁴ انسان څۀ وى چې تۀ پرې نظر ساتې، نو بنيادم څۀ وى چې تۀ يې خيال ساتې؟

⁵ تا د فرښتو نه لږ کم کړے دے تا هم د جلال او عزت تاج ورپه سر کړے دے.

⁶ تا په خپل مخلوق بنيادم واکمن کړے دے، تا په هر څيز پوره اختيار ورکړے دے.

⁷ کۀ ګډې کۀ رَمې د بيابان، او کۀ دى ټول ځنګلى ځناوران.

⁸ کۀ مارغان دى په هوا کښې او کۀ کبان دى سمندر کښې، يا نور داسې څيزونه چې ګرځيږى سمندر کښې.

⁹ اے مالِکه خُدايه، زمونږ ربه، ټوله دُنيا کښې ستا نوم عظيم دے.