زبور 64 - Pakistani Yousafzai Pashto

څلور شپېتم زبور د دشمنانو د شر نه د حفاظت دُعا

د موسيقۍ د مشر دپاره: د حضرت داؤد يو زبور

¹ اے پاکه خُدايه، زما آواز تۀ واوره، زما ژوند د دشمنانو د يرې نه وساته.

² ما د بدعمله د پټو منصوبو نه په امان کړه، ما د بدکردارو د قبيلې نه په امان کړه.

³ خپلې ژبې يې لکه د تُورو په شان تېرې کړې دى، او د هغوئ بدې او ترخې خبرې لکه وژونکو غشو په شان دى،

⁴ هغوئ د پټ ځائ نه په بې‌ګناه کس ګزارونه کوى. دوئ د چا نه نۀ يريږى ناڅاپه پرې ګزارونه کوى.

⁵ په بدو منصوبو کښې دوئ د يو بل ډاډګيرنه کوى. او په خپلو کښې په مشورې سره پټ دامونه ږدى، په خپلو کښې دا خيال کوى چې څوک به مونږ وګورى؟

⁶ دوئ په بې‌اِنصافۍ سره منصوبې جوړوى، او دوئ وائى چې، ”مونږ ډېره ښۀ منصوبه جوړه کړُو.“ د انسان عقل او زړۀ دواړه څومره چالاکه دى.

⁷ خو خُدائ پاک به دوئ په غشو باندې ولى، او ناګهانه به دوئ زخمى کړى.

⁸ د دوئ خپلې ژبې به هم دوئ تباه کوى. هر هغه څوک چې دوئ ته ګورى نو په سپکه به خپل سرونه هغوئ پورې خوځوى،

⁹ او ټول انسانان به وۀ يريږى. دوئ به د خُدائ پاک د شان کارونه بيان کړى، او د هغۀ په کارونو به فکر کوى.

¹⁰ ټول صادقان دې د مالِک خُدائ خوشحالى وکړى او په هغۀ کښې دې پناه واخلى. او ټول نېکان دې د خُدائ پاک ثناء صِفت ادا کړى.