زبور 54 - Pakistani Yousafzai Pashto

څلور پنځوسم زبور د دشمنانو نه د حفاظت دپاره دُعا

د موسيقۍ د مشر دپاره: د تاريزه سامان سره د حضرت داؤد يو نظم کله چې زيفت ساؤل له لاړو او وې وئيل، ”داؤد زمونږ سره پټ دے.“

¹ په خپل نوم سره دې ما ته خلاصون راکړه خُدايه، په خپل قدرت سره دې زما بې‌ګناهى ثابته کړه.

² دُعا زما واوره، اے پاکه خُدايه، د خولې خبرې زما واوره.

³ پردى خلق په ما حملې کوى او ظالمان زما د مرګ کوشش کوى، او هغوئ د خُدائ پاک پرواه نۀ کوى.

⁴ خو بې‌شکه خُدائ زما مددګار دے، او مالِک خُدائ په خپله ما ژوندے ساتى.

⁵ زما دشمنان دې په خپلو بدو کښې په خپله راګېر شى، او خپله وفادارى دې وښايه او دوئ تباه کړه.

⁶ زۀ به د زړۀ نه تا ته نذرانې پېش کړم، ځکه چې ستا نوم خوږ دے زۀ به ستا د نوم ثناء صِفت وکړم.

⁷ بې‌شکه چې زۀ تا د ټولو مصيبتونو نه بچ کړم، او زۀ د خپلو دشمنانو شکست په خپلو سترګو باندې وينم.