زبور 26 - Pakistani Yousafzai Pashto

شپږويشتم زبور د نېک انسان دُعا

د حضرت داؤد يو زبور

¹ اے مالِکه خُدايه، زما د بې‌ګناهۍ په حقله تاسو فېصله وکړئ، ځکه چې ما تل نېکى کړې ده، ما په مالِک خُدائ بې‌شکه باور کړے دے.

² اے مالِکه خُدايه په ما آزمېښت وکړه او تيار مې کړه، زما د زړۀ او خيالونو آزمېښت وکړه.

³ خو زۀ ستا د بې‌شانه مينې نه همېشه خبر يم، نو ځکه زۀ ستا د حقيقت په مطابق ژوند تېروم.

⁴ زۀ د دروغژنو خلقو سره نۀ کښېنم، نۀ د مُنافقانو سره په لاره ځم،

⁵ د بدعملو د محفل نه زۀ نفرت کوم او نۀ زۀ د شريرانو ملګرتيا کوم.

⁶ زۀ خپل لاسونه د ګناه نه وينځم، اے مالِکه خُدايه، نو ستا قربان‌ګاه نه به طواف کوم.

⁷ زۀ به د شکرانې سندرې وايم او ستا ټول عجيبه کارونه به وايم.

⁸ زۀ مينه کوم مالِکه خُدايه ستا مقدس کور سره، چرته چې ستا جلالى حضور اوسيږى هغه ځائ سره.

⁹ ما د ګناهګارانو سره مۀ حسابوه، ما د قاتلانو سره مۀ مجرم کوه.

¹⁰ په ناپاکه منصوبو د هغوئ لاسونه سخا دى، د رشوت نه ډک هر وخت د هغوئ لاسونه دى.

¹¹ خو زۀ داسې نۀ يم، زۀ په دُنيا کښې پاک اوسېږم، په ما شه مِهربانه او ما بچ کړه.

¹² زۀ اوس په هوار مېدان ولاړ يم، زۀ به د ټول جماعت په وړاندې د مالِک خُدائ ثناء صِفت وايم.