زبور 24 - Pakistani Yousafzai Pashto

څليريشتم زبور د جلال بادشاه

د حضرت داؤد يو زبور

¹ دا دُنيا د مالِک خُدائ ده او هر څۀ چې په دې کښې دى، دا ټوله دُنيا او انسانان څوک چې په دې کښې دى.

² په دريابونو باندې اېښى مالِک خُدائ د زمکې بنيادونه دى، دا زمکه يې په سمندر باندې آباده کړې ده.

³ د مالِک خُدائ غر ته څوک ورختلے شى؟ او څوک د هغۀ مقدس ځائ کښې ودرېدلے شى؟

⁴ يواځې هغه څوک چې يې زړونه او لاسونه پاک وى، څوک چې د بُتانو عبادت نۀ کوى، او هيڅکله د دروغو قسمونه نۀ کوى.

⁵ دوئ ته به د مالِک خُدائ برکت مِلاو شى، او خپل خلاصونکى خُدائ پاک نه به صداقت حاصل کړى.

⁶ او هم داسې خلق ستا د مخ لټون کوى، اے د يعقوب خُدايه، دوئ به ستا طلب کوى.

⁷ اے زړو دروازو کولاو شئ، ابدى ورونو خلاص شئ، چې د جلال بادشاه دننه درشى.

⁸ هغه د جلال بادشاه څوک دے؟ هغه دے مالِک خُدائ چې ډېر قوى او زورَور دے، هغه مالِک خُدائ چې په جنګ کښې تکړه دے.

⁹ اے زړو دروازو کولاو شئ، ابدى وروڼو خلاص شئ، چې د جلال بادشاه دننه درشى.

¹⁰ هغه د جلال بادشاه څوک دے؟ هغه ربُ الافواج دے، هغه د جلال بادشاه دے.