زبور 23 - Pakistani Yousafzai Pashto

درويشتم زبور مالِک دے شپون زما

د حضرت داؤد يو زبور

¹ مالِک خُدائ دے شپون زما، نو د هيڅ څيز حاجت نشته دے زما.

² راکوى آرام په شين چمن کښې ما له، بوځى مې هغه د آرامو اوبو خوا له.

³ هغه راکوى تازه او نوے قوت ما له، په نېغه لار مې بيائى د خپل نوم دپاره.

⁴ کۀ څۀ هم د مرګ وادۍ نه زۀ تېرېږم، خو تۀ زما په څنګ يې نو نۀ يرېږم، ستا په چوکه او امسا زما تسلى ده.

⁵ تۀ زما د دشمنانو په وړاندې تياروې ډېر خوراک ما له، تۀ مې سر په تېلو غوړوې نو په دې عزت راکوې ما له، تۀ د خپل برکت نه تر څنډو ډکوې پياله ما له.

⁶ بې‌شکه ستا نېکى او مينه به وى زما د ټول ژوند دپاره، زۀ به د مالِک خُدائ کور کښې اوسېږم د تل دپاره.