زبور 136 - Pakistani Yousafzai Pashto

يو سل او شپږ دېرشم زبور

د شُکر ګزارۍ سرود

¹ د مالِک خُدائ شُکر ګزارى وکړئ، ځکه چې هغه ښۀ دے. د هغۀ مينه ابدى ده.

² د خُدائ پاک شُکر ګزارى وکړئ، چې د معبودانو خُدائ پاک دے. د هغۀ مينه ابدى ده.

³ د مالِک خُدائ شُکر ګزارى وکړئ چې د مالِکانو مالِک خُدائ دے. د هغۀ مينه ابدى ده.

⁴ د هغۀ شُکر ګزارى وکړئ چې صرف هغه لوئې معجزې کوى، د هغۀ مينه ابدى ده.

⁵ او هغه چا چې آسمانونه يې په حِکمت سره پېدا کړل، د هغۀ مينه ابدى ده.

⁶ او د هغۀ شُکر ګزارى وکړئ چا چې زمکه د اوبو دپاسه خوره کړله، د هغۀ مينه ابدى ده.

⁷ او د هغۀ شُکر ګزارى وکړئ چا چې آسمانى رڼاګانې پېدا کړې، د هغۀ مينه ابدى ده.

⁸ نمر په ورځ باندې بادشاهى کوى، د هغۀ مينه ابدى ده.

⁹ سپوږمۍ او ستورى په شپه باندې حکومت کوى، د هغۀ مينه ابدى ده.

¹⁰ د هغۀ شُکر ګزارى وکړئ چا چې مِصريانو له وړومبى پېدا شوى هلاک کړل، د هغۀ مينه ابدى ده.

¹¹ هغۀ بنى اِسرائيل د مِصر د مينځ نه راوويستل، د هغۀ مينه ابدى ده.

¹² چا چې په هغه وخت د خپل طاقت او قدرت څرګندونه وکړه، د هغۀ مينه ابدى ده.

¹³ او د هغۀ شُکر ګزارى وکړئ چا چې بحرِقُلزم په مينځ دوه کړو، د هغۀ مينه ابدى ده.

¹⁴ او هغۀ بنى اِسرائيل د دې په مينځ کښې بوتلل، د هغۀ مينه ابدى ده.

¹⁵ خو فِرعون سره د نوکرانو په بحرِقُلزم کښې غرق شو، د هغۀ مينه ابدى ده.

¹⁶ او د هغۀ شُکر ګزارى وکړئ چا چې د خپلو خلقو په بيابان کښې لارښودنه وکړله، د هغۀ مينه ابدى ده.

¹⁷ د هغۀ شُکر ګزارى کوئ چا چې لوئ بادشاهان رانسکور کړل، د هغۀ مينه ابدى ده.

¹⁸ او هغۀ تکړه بادشاهان هلاک کړل، د هغۀ مينه ابدى ده.

¹⁹ سيحون د اموريانو بادشاه يې مړ کړلو، د هغۀ مينه ابدى ده.

²⁰ عوج د بسن بادشاه يې مړ کړلو، د هغۀ مينه ابدى ده.

²¹ او هغۀ د هغوئ مُلک دوئ ته په ميراث کښې ورکړو، د هغۀ مينه ابدى ده.

²² او په ميراث کښې يې خِدمتګار بنى اِسرائيل ته ورکړو، د هغۀ مينه ابدى ده.

²³ د هغۀ شُکر ګزارى وکړئ چا ته چې مونږ د کمزورتيا په حالت کښې ياد وُو، د هغۀ مينه ابدى ده.

²⁴ او مونږ يې د خپلو دشمنانو نه خلاص کړلو، د هغۀ مينه ابدى ده.

²⁵ او څوک چې هر يو مخلوق ته رزق ورکوى، د هغۀ مينه ابدى ده.

²⁶ د آسمانونو د خُدائ شُکر ادا کړئ، د هغۀ مينه ابدى ده.