زبور 135 - Pakistani Yousafzai Pashto

يو سل او پينځۀ دېرشم زبور

د حمد و ثناء سرود

¹ د مالِک خُدائ ثناء صِفت وکړئ، د مالِک خُدائ د نوم ثناء صِفت وکړئ، اے د مالِک خُدائ خِدمتګارانو تاسو د هغۀ ثناء صِفت وکړئ،

² تاسو څوک چې د مالِک خُدائ کور کښې خِدمت کوئ، زمونږ د خُدائ پاک د کور په دربار کښې.

³ د مالِک خُدائ ثناء صِفت وکړئ ځکه چې مالِک خُدائ ښۀ دے، د هغۀ د نوم ثناء صِفت وکړئ. ځکه چې ډېره مزه کوى.

⁴ ځکه چې مالِک خُدائ يعقوب غوره کړو، د دې دپاره چې هغه د هغۀ شى، او بنى اِسرائيل چې د هغۀ خاص ملکيت شى.

⁵ زۀ پوهېږم چې مالِک خُدائ لوئ دے، زمونږ مالِک خُدائ د نورو ټولو معبودانو نه لوئ دے.

⁶ مالِک خُدائ هغه څۀ کوى څۀ چې هغه خوشحالوى، په ټوله زمکه او آسمانونو کښې، په سمندرونو کښې او د هغۀ په ټولو ژورو ځايونو کښې.

⁷ د زمکې د آخر سر نه هغه وريځې راپورته کوى، او هغه باران سره برېښنا رالېږى او هغه هوا د خپلو ذخيرو نه رالوځوى.

⁸ هغۀ وړومبى پېدا شوى ماشومان ووژل د مِصريانو، وړومبى پېدا شوى د سړو او د ځناورانو.

⁹ هغۀ په مِصر کښې معجزې او عجيبه کارونه وکړل، د فِرعون او د هغۀ د ټولو نوکرانو په خلاف.

¹⁰ هغۀ ډېرو قومونو ته شکست ورکړو او هغۀ طاقتور بادشاهان ووژل،

¹¹ د اموريانو بادشاه سيحون د بسن بادشاه عوج، هغۀ د کنعان ټول بادشاهان ووژل.

¹² او هغۀ د هغوئ مُلک په ميراث کښې ورکړو، او خپلو خلقو بنى اِسرائيلو ته يې په ميراث کښې ورکړو.

¹³ ستا نوم مالِکه خُدايه د تل دپاره ياديږى، او ستا نوم به په ټولو نسلونو کښې ياديږى.

¹⁴ ځکه چې مالِک خُدائ د خپلو خلقو اِنصاف کوى، او هغه په خپلو خِدمتګارانو رحم کوى.

¹⁵ د قومونو بُتان چې د سرو زرو او سپينو نه جوړ شوى دى، د انسانانو په لاسونو جوړ شوى دى.

¹⁶ د هغوئ خولې شته خو خبرې نۀ شى کولے، د هغوئ سترګې شته خو ليدل نۀ شى کولے،

¹⁷ د هغوئ غوږونه شته خو اورېدل نۀ شى کولے، او نۀ هغوئ په خولۀ ساه اخستلے شى.

¹⁸ څوک چې دا بُتان جوړوى دوئ به هم د دې په شان وى څوک چې پرې ايمان لرى هغوئ به هم د دې په شان وى.

¹⁹ اے د بنى اِسرائيل خاندانه د مالِک خُدائ ثناء ووايئ، اے د هارون خاندانه د مالِک خُدائ ثناء ووايئ،

²⁰ اے د ليويانو خاندانه د مالِک خُدائ صِفت کوئ، او تاسو څوک چې د مالِک خُدائ نه يرېږئ د مالِک خُدائ ثناء صِفت کوئ،

²¹ د صيون نه دې د مالِک خُدائ ثناء صِفت وى، هغۀ ته دې ثناء صِفت وى څوک چې په يروشلم کښې اوسيږى. د مالِک خُدائ ثناء صِفت وکړئ.