زبور 118 - Pakistani Yousafzai Pashto

يو سل او اتلسم زبور

¹ د مالِک خُدائ شُکر وباسئ ځکه چې هغه ښۀ دے، د هغۀ مينه د تل دپاره پاتې کيږى.

² بنى اِسرائيل دې داسې ووائى، ”د هغۀ مينه د تل دپاره پاتې کيږى.“

³ د هارون خاندان دې داسې ووائى، ”د هغۀ مينه د تل دپاره پاتې کيږى.“

⁴ هغوئ څوک چې د مالِک خُدائ نه يريږى، دې ووائى، ”د هغۀ مينه د تل دپاره پاتې کيږى.“

⁵ ما په سخته کښې مالِک خُدائ ته سوال زارى وکړه، هغۀ زما سوال قبول کړو او زۀ يې آزاد کړم.

⁶ مالِک خُدائ زما مل دے زۀ به نۀ يرېږم، انسان زما څۀ کولے شى.

⁷ مالِک خُدائ زما مل دے او هغه زما مددګار دے، زۀ به د خپلو دشمنانو په شکست خوشحالى وکړم.

⁸ دا ښۀ ده چې په مالِک خُدائ کښې پناه واخلم، د دې په ځائ چې په بنيادم توکل وکړم.

⁹ دا بهتره ده چې په مالِک خُدائ کښې پناه واخلم، نه چې په شهزادګانو توکل وکړم.

¹⁰ زۀ ټولو قومونو راګېر کړم، خو د مالِک خُدائ په نوم مې هغوئ مات کړل.

¹¹ زۀ هغوئ د هر طرف نه راګېر کړم، خو د مالِک خُدائ په نوم مې هغوئ مات کړل.

¹² هغوئ زما نه لکه د مچو په شان راتاو شُو، لکه د ازغو د اور په شان زر هلاک شُو، خو د مالِک خُدائ په نوم مې هغوئ مات کړل.

¹³ هغوئ ما له سخته ديکه راکړه چې راپرېوځم، خو مالِک خُدائ زما مدد وکړو،

¹⁴ مالِک خُدائ زما سندره او طاقت دے، هغه زما خلاصونکے جوړ شوے دے.

¹⁵ د خوشحالۍ او د کاميابۍ چغې د صادقانو په خېمو کښې اورېدے شى، ”د مالِک خُدائ ښى لاس زورَور کارونه کړى دى.

¹⁶ د مالِک خُدائ ښے لاس ډېر اوچت دے، د مالِک خُدائ ښى لاس زورَور کارونه کړى دى.“

¹⁷ زۀ به نۀ مرم خو ژوندے به يم، او هغه څۀ چې مالِک خُدائ کړى دى بيانوم.

¹⁸ مالِک خُدائ ما ته سخته سزا راکړه، خو زۀ هغۀ مرګ ته حواله نۀ کړم.

¹⁹ هغۀ ما دپاره د صداقت دروازې پرانستې دى، زۀ به په کښې وردننه شم او د مالِک خُدائ شکريه به ادا کړم.

²⁰ دا د مالِک خُدائ دروازه ده، په کومه به چې صادقان ورداخل شى.

²¹ زۀ به ستا شُکر ادا کړم، ځکه چې تا ما ته جواب راکړے دے، تۀ زما خلاصونکے جوړ شوې.

²² کوم کاڼے چې ګِلکارانو رد کړے دے، هم هغه کاڼے د ګوټ سر کاڼے جوړ شوے دے.

²³ دا کارونه مالِک خُدائ کړى دى، دا زمونږ په خيال حېرانوونکے منظر دے.

²⁴ دا هغه ورځ ده چې مالِک خُدائ جوړه کړې ده، نو راځئ چې خوشحالى وکړُو، او په کښې خوشحاله اوسو.

²⁵ اے مالِکه خُدايه مونږه بچ کړه، اے مالِکه خُدايه مونږ ته کاميابى راکړه.

²⁶ بختور دے هغه څوک چې د مالِک خُدائ په نوم راځى. د مالِک خُدائ د کور نه مونږ ستاسو برکت غواړُو.

²⁷ مالِک خُدائ، خُدائ پاک دے، هغۀ خپله رڼا په مونږ باندې وځلوله، قربانۍ راولئ او په پړو يې د قربان‌ګاه ښکرونو سره وتړئ.

²⁸ تۀ مې خُدائ پاک يې او زۀ به ستا شُکر ادا کړم، تۀ مې خُدائ پاک يې زۀ به ستا لوئى بيان کړم.

²⁹ د مالِک خُدائ شُکر ادا کړئ ځکه چې هغه ښۀ دے، د هغۀ مينه د تل دپاره پاتې کيږى.