زبور 115 - Pakistani Yousafzai Pashto

يو سل او پينځلسم زبور

¹ مونږ ته نه، اے مالِکه خُدايه، مونږ ته نه، خو ستا نوم ته دې جلال وى، ځکه ستا د مينې او وفا په سبب دې وى.

² قومونه ولې وائى چې، ”د دوئ پاک خُدائ چرته دے؟“

³ زمونږ پاک خُدائ په آسمان کښې دے، هر هغه څۀ کوى چې څۀ د هغۀ خوښ وى.

⁴ خو د هغوئ بُتان د سرو او سپينو زرو دى، چې د انسانانو په لاسونو جوړ شوى دى.

⁵ د هغوئ خولې شته خو خبرې پرې کولے نۀ شى، سترګې يې هم شته خو پرې ليدلے نۀ شى.

⁶ د هغوئ غوږونه شته خو پرې اورېدلے نۀ شى، پوزې يې هم شته خو پرې بويولے نۀ شى.

⁷ د هغوئ لاسونه هم شته خو پرې څۀ محسوسولے نۀ شى، د هغوئ پښې هم شته خو پرې ګرځېدلے نۀ شى، خو هيڅ قسمه آواز د مرۍ نه ويستلے نۀ شى.

⁸ چا چې دا جوړ کړى دى نو د هغوئ په شان به شى، او بيا هم هغوئ ټول، څوک چې پرې يقين لرى.

⁹ اے بنى اِسرائيلو په مالِک خُدائ باندې توکل کوئ، هغه ستاسو ډال دے او ستا مدد کوى.

¹⁰ اے د هارون خاندانه په مالِک خُدائ باندې توکل کوئ، هغه ستاسو ډال دے او مدد کوى.

¹¹ اے تاسو چې د هغۀ نه يره کوئ په مالِک خُدائ باندې توکل کوئ، هغه ستاسو ډال دے او مدد کوى.

¹² مالِک خُدائ ته مونږ ياد يُو او برکت به راکړى، هغه به د بنى اِسرائيلو خاندان له برکت ورکړى، هغه به د هارون خاندان له برکت ورکړى.

¹³ هغه به هغه چا له برکت ورکړى څوک چې د مالِک خُدائ نه يريږى، لويو او واړو ټولو ته به يو شان ملاويږى.

¹⁴ مالِک خُدائ دې تاسو زيات کړى، تاسو او ستاسو د بچو نسل دې زيات کړى.

¹⁵ مالِک خُدائ دې تاسو له برکت درکړى، څوک چې د آسمان او زمکې خالق دے.

¹⁶ اوچت آسمانونه د مالِک خُدائ دى، خو زمکه يې انسان له ورکړې ده.

¹⁷ مړى خو د مالِک خُدائ ثناء صِفت نۀ کوى، هغوئ څوک چې لاندې خاموشۍ طرف ته روان وى.

¹⁸ خو مونږ يُو چې د مالِک خُدائ ثناء صِفت کوُو، په دواړه وختونو کښې اوس هم او د تل دپاره هم لوئى بيانوو، د مالِک خُدائ ثناء صِفت دې وى.