متلونه 2 - Pakistani Yousafzai Pashto

دوېم باب د حِکمت فائدې

¹ زما زويه، کۀ تۀ زما خبرې ومنې او زما حُکمونه په زړۀ کښې محفوظ کړې،

² او د عقل خبرو ته غوږ ونيسې او خپل زړۀ د هوښيارتيا طرف ته مائل کړې،

³ نو بيا د پوهې طلب کوه او د حِکمت دپاره په تېزه نعرې ووهه.

⁴ تۀ د دوئ داسې تلاش وکړه لکه د سپينو زرو چې کوې او يا يې داسې لټون وکړه لکه چې د پټې خزانې کوې.

⁵ نو بيا به تۀ د مالِک خُدائ په يره باندې پوهه شې او د خُدائ پاک عِلم به حاصل کړې.

⁶ ځکه چې مالِک خُدائ عقل او حِکمت ورکوى، او د هغۀ د خولې نه عِلم او پوهه راوځى.

⁷ هغه د نېکو خلقو دپاره د عقلمندۍ خزانې ساتى، هغه د هغه چا دپاره ډال دے د چا کردار چې بې‌داغه وى.

⁸ هغه د اِنصاف کوونکو د لارو ساتنه کوى او هغه د خپلو مقدسينو حفاظت کوى.

⁹ نو تۀ به په دې پوهه شې چې څۀ ښۀ او د اِنصاف او مناسب دى. او تۀ به د ژوند نېغه لار بيامومې.

¹⁰ نو تۀ به عقلمند شې او ستا عِلم او پوهه به ستا روح ته خوشحالى ورکړى.

¹¹ تميز به په تا نظر ساتى او پوهه به ستا حِفاظت کوى.

¹² عقل به تا د بدکاره خلقو نه ساتى، او د هغوئ نه چې د چا خبرې چې غلطې دى،

¹³ چا چې صحيح لاره پرېښې ده او په تيارو کښې تلل کوى،

¹⁴ څوک چې د خرابو کارونو په کولو خوشحاليږى او د بدعملو په شرارت خوشحالى کوى،

¹⁵ او دغه کسان په کږو وږو سر دى او د هغوئ چال چلن د ټګۍ دے.

¹⁶ نو هغه به تا د بدکارې ښځې نه وساتى، د هغې زناکارې نه څوک چې په خوږو خبرو تا دوکه کول غواړى،

¹⁷ چا چې خپل د ځوانۍ د وخت خاوند پرېښے دے او خپل لوظ يې هېر کړو کوم يې چې د خُدائ پاک په وړاندې کړے وو.

¹⁸ د هغې کور ته تلل مرګ ته دعوت دے، او د هغې د کور لار د قبر لار ده.

¹⁹ څوک چې هغې له ورشى نو هغه بيا نۀ راواپس کيږى او هغه بيا هيڅکله د ژوند په لاره راتلے نۀ شى.

²⁰ نو بيا تۀ د ښو خلقو په طريقو تلل کوه او د صادقانو په لارو کښې پاتې شه.

²¹ نو نېکان به په مُلک کښې اوسيږى، او بې‌داغه خلق به په کښې پاتې شى.

²² خو بدعمله به د هغه مُلک نه وشړلے شى، او غداران به ترې د بېخ نه وويستلے شى.