Zacharie 8 - La Sainte Bible en Langue Yipunu

Pangini jiduvotsu na jidigumba

¹ Fumu Mabadi amansingula bulumbi buebubu rie:

² Menu Fumu nyirondi tindi uronda Jerusalem duonyi dutombisi ugaangu na kabu jineni.

³ La dibandu nyivosili rie: Ugabuga nyigabuyi o Jerusalem na nyuyetsana o Sion. Jerusalem unengulungu musiengi usigama na Sion, mukongu ami unengulungu mukongu uNsambi.

⁴ Nyivosirie: Binunu bibabaala na bibagetu mutu mutu na dupangu va dikaka bomuetsananga o Jerusalem.

⁵ Mansila mamusiengi mobasa de na bafudu na banumba aboyenasananga muna.

⁶ Bansialutsu baIsrael botumuna paga na dionyi tumba Menu Fumu Mabadi nyurungula udivaga.

⁷ Nyivanginirie: Nyuwaka batu bami kalala jogu abavu o yiari ayi wisi epalili nesi abavu o yiari ayi wisi ewendisini.

⁸ Nyubagabusa na botsananga o Jerusalem; jogu boba batu bami; menu nyuba Nsambi ogu. Nyubarumanga na ngensa na dusungugu.

⁹ Fumu Mabadi amavosa rie: Warisanu mirima mienu! Jenu aduigulu mambu mababiyitsi namunyi, amamagulunu yilumbu ayi yibuga yiNdagu Nsambi yimasundulu.

¹⁰ Na kala mutu asamafutungu nesi bisalu bibibulu bisamafutu. Batu basamakotanga nopalanga mu diambu dibatu abamabavinanga, nyimasibisa mutu mutu nandi.

¹¹ Menu Fumu Mabadi nyivosi rie: Namunyi nyisaa ombu bansialutsu bebaba nana nyimalebila kala kala.

¹² Mu mbari tsangu tsiufunanga, mfuga jirayisan jiuburanga, butamba bubendisa bivaru, julu jiunoyisa mfula. Nyulasa maboti meni motsu ombu bansialutsu babatu bami.

¹³ Bufumu buJuda na buIsrael bumalabu bulogu o malongu. Namunyi nyiduwaki kalala na dulabu batu abamagabulu miula. Duyalaba keri, warisanu mirima!

¹⁴ Fumu Mabadi jandi rie: Ava bataji benu bamanyoyisila nyimatasa uduvaga dibi; nyisamavinsa kingu.

¹⁵ Tumba namunyi nyimagabusa minima ami nsima nyudufunisila maboti jenu bisi Jerusalem na baJuda. Duyalaba keri.

¹⁶ Guluanu adi vengu duvaga: mutu mutu avosi ngensa na mutu nandi. Tabulanu bunsonsi bungesa; muegabusanu duvotsu.

¹⁷ Mutu mutu va gari enu ayatasa uvayila mutu nandi dibi na duyaleva pesi tsimfurulu. Fumu amavosa rie: Nyivini motsu mana.

Bilumbu biubusa uji biukaluga bilumbu bibafeta

¹⁸ Fumu Mabadi amansingula bulumbi buebubu rie:

¹⁹ Nyidutsinguli rie: Ubusa uji mu tsungi jimuina nesi jimuranu nesi jimusambuali nesi jimugumi, ukaluga yika bilumbu binsangu ombu bisi ndagu Juda. Rondanu ngensa na duvotsu.

²⁰ Fumu Mabadi jandi rie: Vomueruga batu na bisi malongu na bisi misiengi mipuela bomueruga o Jerusalem.

²¹ Bisi musiengi umosi bowenda o musiengi ususu uyevosa rie: Tʼwendianu uyelembiyila Fumu noyeromba Fumu Mabadi! Bobawaka rie: Tʼwendianu.

²² Batu bapuela ne bisi malongu mapuela boruga uyiromba Fumu Mabadi o Jerusalem nomulembiyila.

²³ Nyivosi rie: Muna bilumbu bieni yigumi yibabaala bakadi mbembu bogaanga muJuif mu mulemba uyiduaru yiandi novosa rie: Tuwenda nagu, mu mbari tumagulu yiri Nsambi avu nagu.