Zacharie 7 - La Sainte Bible en Langue Yipunu

Ubusa uji urangimina dubungu duJerusalem

¹ Mu yilima yimuina bidurumu dukaga Darius, Fumu amansingula bulumbi mu yilumbu yimuina yitsungi jirnufu.

² Bisi Bethel bamasindiga Chareser na Reguem-Melek na batu bandi uyelembiyila Fumu.

³ Noyewivula bavagulitsi bapagu baFumu Mabadi na babiyitsi rie: Vengu tumuelilanga nobusanga uji mu tsungi jimuranu nana tumalevayilanga na kala?

⁴ Kabogu Fumu Mabadi amamuetuma rie:

⁵ Tsingula batu botsu na bavagulitsi bapagu rie: Tuka magumidusambuali mabilima, dumabusanga uji na dumalilanga mu tsungi jimuranu na jimusambuali. Dibandu yi dumabusila uji tsiri undasa ubueji?

⁶ Ava duijangingi nonuanganga, tsia jenu beni duikelasa ubueji!

⁷ Dugejabi mambu maFumu ama babiyitsi batega bamatubula ava Jerusalem mbe ukitsanunu? Tsia umaba sui na misiengi amimaba yiari na yiari? Tsia o tandu no kumu umabanganga batu?

⁸ Fumu Mabadi amatuma urangimina ama amavosa kala rie:

⁹ Lasasananu tindi dusungugu, mutu mutu alasi muana taji andi durondu na yingeba.

¹⁰ Duyakambisa bisiana nesi benyi nesi bijaga, duyatasa uvaganga mabi.

¹¹ Tumba bamabusa ugulu, bamandiyila nsima na bamadibiga matuji mogu yiri bakegulu.

¹² Bamagalisa mirima miogu tindi ugalisa yiri bagogulu migaga na malongi maFumu Mabadi ama Yinyunyi yiandi amasalisa babiyitsi ubatsingula.

¹³ Fumu Mabadi amavosa rie: Nyimabanengila, jogu basamagulu, dedi mosi jogu bamandengila meʼ wami nyimabusa ubawagula.

¹⁴ Nyimabapansa o malongu motsu ama jogu bagejabi o nsima ogu. Bulongu bumapansu, batu basamamuevioyilanga vana; bulongu abumaleba buboti bamabukalusa bivongu na bivongu.