Zacharie 6 - La Sainte Bible en Langue Yipunu

Yiariariamu yimunana: makaiu mana

¹ Nyimamuelaba yiriariamu yisusu na nyimalaba makaiu mana amamapalila va gari mikongu mibeji mikunga.

² Dikalu aditega dimadutu na bakabala babenga, dikalu adimubeji dimadutu na bakabala bapinda,

³ dikalu adimurieru dimadutu na bakabala bavema, dikalu adimuina dimadutu na bakabala abamaba na matodi mabenga.

⁴ Nyimawivula yiansa ayimavosa nami rie: Fumu ami yina yi?

⁵ Yiansa yimakwaka rie: Mavu punga jina. Tsivu va gusu Fumu jibulongu buotsu na upala tsipali.

⁶ Bakabala bapinda uduta beduti dikalu adiuwenda o yiari yibanda na abavema uweʼ bewendi o yiari ayi wisi ewendisini; abamaba na matodi uweʼ bewendi o yiari yitandu.

⁷ Ababenga bamakueka na bamawivula uyenalinganga o bulongu buotsu. Fumu amabaruma rie: Wendanu, yenalinganganu o bulongu buotsu. Adina bamavaga.

⁸ Fumu amandengila na amansingula rie: Gengilati, jogu abewendi o yiari yibanda bosundusa Yinyunyi yiami o yiari yieni.

Mbigulu jidugaba duYechoua

⁹ Fumu amatuma rie:

¹⁰ Singa milendu mibakoli ami Heldai na Tobia na Yedayia boguvega. Gukawenda ndeʼ beni namunyi o ndagu Yosia muana dibaala uSefania agu jogu bamawenda ava bamaruyila o Babylone.

¹¹ Gukabonga lora jivema na lora, gukatsivayila dugaba adu guduisa Yechoua muana dibaala uYossadac aguvu yivunda yibava-gulitsi bapagu.

¹² Gukamutsingula rie: Fumu Mabadi jandi rie: Va dibaala vava, diina diandi Yitayi, ayiupalilanga monyu jandi omuerungisa ndagu ami.

¹³ Nyiina, jandi omuejirungisa. Oduaranga yilinga yibukaga; otsananga va yitsiga yibufumu norumanga bisi bulongu. Muvagulitsi upagu obanganga va mugula andi; bobanganga na murima umosi.

¹⁴ Dugaba dusuegu o Ndagu Nsambi; duba yirangumunu yiHeldai na Tobia na Yedayia na busina bubaana bababaala baSefania.

¹⁵ Jogu abavu vala boruga uyirungulila Ndagu Nsambi. Mbana dujaba yiri Fumu Mabadi amasindiga ombu genu. Adina diulabana pa duigulu diufi diFumu Nsambi enu.