Zacharie 5 - La Sainte Bible en Langue Yipunu

Yiriariamu yimusiamunu: dibuku dimulogu

¹ Nyimamuelaba yiriariamu yisusu na nyimalaba dibuku adimayenapurumuganga.

² Yiansa yimakwivula rie: Yi guilabi? Nyimawaka rie: Dibuku adipurumuyi; divu na usakama uyigumi yimetera na uroga umetera yiranu.

³ Mbana yimansingula rie: Divu mulogu aguinyavi mu bulongu buotsu mu mbari dionyi divosi yiri mudayitsi uotsu obingu vava, nesi abelevi pesi tsimfurulu bobingu.

⁴ Menu Fumu Mabadi nyivosi rie: Meʼ beni nyutinda mulogu eni: ukota o ndagu kadi mudayitsi no ndagu mutu uotsu oyilevi pesi tsimamfurulu na diina diami; utsananga muna na unyensa nesi tsimbi nesi mamanyi.

Yiriariamu yimusambuali: mugetu aguvu bukanyi

⁵ Yiansa ayimavosa nami yimakueka na yimansingula rie: Buaga misu no gengila ayipali vana.

⁶ Nyimawivula rie: Ayi? Yimansingula rie: Ayina yivu yievi ayibasa na mabi mabulongu buotsu.

⁷ Vamaba yidibutsu yibiumbu ayimadibuga na vamaba mugetu agumatsana va gari yievi yieni.

⁸ Yiansa yimavosa rie: Mugetu uvu bukanyi. Amamusindila o gari yievi mbana amayidibiga na yidibutsu yibiumbu.

⁹ Nyimamuebuaga misu na nyimalaba bagetu babeji abamapurumuga. Barnaba na mapapi nderi masigonya. Bamabega yievi na bamayenapurumuga na yionyi te no yiliyili.

¹⁰ Nyimawivula yiansa ayimavosa nami rie: Agunyi bebeyi yievi?

¹¹ Yimakwaka rie: Bewendi uyeyirungila ndagu o bulongu buMesopotamie pa jimasuka urungu mbana yiuyesunsu.