Zacharie 4 - La Sainte Bible en Langue Yipunu

Yiriariamu ayimuranu: dingasa na mioliva

¹ Yiansa ayimavosa nami yimagabuga na yimatambusa nderi mutu agu berambusi o tsi yilu.

² Yimakwivula rie: Yi guilabi? Nyimawaka rie: Nyilabi dingasa adivu lora na lora, va julu dionyi vavu yisuegulu yimatsi na divu na yisambuali yibalambi abavu na yisambuali yimivievi amivu na kadi dingasa.

³ Va mugula dionyi vavu mioliva mibeji, umosi o yiari yimabaala madingasa na ususu o yiari yimagetu.

⁴ Nyimamuewivula yiansa ayimavosa nami rie: Fumu ami, motsu mana divindugulu yi?

⁵ Yiansa ayimavosa nami yimakwivula rie: Gugejabi divindugulu dimambu meni? Nyimawaka rie: Nyiina, fumu ami.

^6a Mbana yimamuensingula rie:

^10b Yisambuali yilambi yivu misi maFumu amagengila butamba buotsu.

¹¹ Nyimamuwivula rie: Mioliva amivu o yiari yimabaala na yimagetu madingasa, divindugulu yi?

¹² Nyimamuewivula rie: Bitayi bibeji bimioliva abivu bebeli na mivievi milora amikelumusi matsi, divindugulu yi?

¹³ Yimakwivula rie: Gdgejabi divindugulu dibionyi? Nyimawaka rie: Nyiina, fumu ami.

¹⁴ Mbana yimavosa rie: Bivu bibiatsi bibeji abivu va gusu Fumu jibulongu buotsu. Pangini mu diambu diZorobabel

^6b Amama mavu mambu ama Fumu etsinguli Zorobabel rie: Fumu Mabadi jandi rie: Tsiri na musuga, tsiri na mangolu tumba na Yinyunyi yiami.

⁷ Amabuela rie: Mukongu usakama yi guvu va gusu Zorobabel? Ndeʼ gudesungu; osunsa dimanyi ditega ava bogamuyilanga na nsangu rie: Maboti, maboti mandi.

⁸ Fumu amansingula rie:

⁹ Zorobabel amasunda yibuga yiNdagu ejiji na ojimanisila. Mbana gujaba yiri Fumu Mabadi amansindiga ombu genu.

^10a Mu mbari jogu abamalensa yilumbu yidibandu digeyi bosangila ava bolabila yiri Zorobabel usala esali.