Zacharie 2 - La Sainte Bible en Langue Yipunu

Yiriariamu yimubeji: masiyi na mukuba

¹ Mu yiriariamu yisusu nyimalaba masiyi mana.

² Nyimawivula yiansa ayimavosa nami rie: Masiyi amana mayi? Yimansingula rie: Masiyi amana mavu malongu mamangolu amamapansa bisi Juda na baIsrael na bisi Jerusalem.

³ Mbana Fumu amandasa bakuba bana.

⁴ Nyimawivula rie: Yisalu yi besali? Amansingula rie: Bakuba beni bamaruga ulasa malongu mamangolu goma, amamaretsama utoga na Juda; bamapansa tindi upansa bisi malongu meni.

Yiriariamu yimurieru: mukudu uwetsiyila

⁵ Mu yiriariamu yisusu nyimalaba dibaala adimaba na mukudu va dikaka uwetisga.

⁶ Nyimawivula rie: Aguʼ guiwendi? Amawaka rie: O Jerusalem ujaba yietsu yiuroga nesi yiusakama yi-uonyi.

⁷ Mbana yiansa ayimavosa nami yimakueka, yiansa yisusu yimamubengusana.

⁸ Yimamuruma rie: Wenda mbangu uyetsingula mufudu aguvu na mukudu rie: Jerusalem ugoba na bivaga mu mbari batu na bibulu bofunanga muna.

⁹ Fumu amavosa rie: Menu nyuba yivaga yimuji utsiengila musiengi eni na nyuba bundumba bu-uonyi.

Fumu urangimina erangimini bakoli

¹⁰ Fumu amavosa rie: Nyimadupansa o biari biotsu bibina bipunga. Rinanu, gusuganu o bulongu bubanda!

¹¹ Bisi Jerusalem abavu bakoli o Babylone, lensanu norina!

¹² Fumu Mabadi agumapega yisalu yineni evosi mu diambu dimalongu amamadukinda rie: Jandi oyidubembi ebembi yikokosi yiami.

¹³ Nyubalasa mangolu mami, bokindu na baviga bogu. Mbana dujaba yiri Fumu Mabadi amansindiga.

¹⁴ Fumu amamuevosa rie: Jenu bisi Jerusalem, gamuganu migamu minsangu na sangilanu!

¹⁵ Va temu eni bisi malongu mapuela bofubana nami, menu aguvu Fumu, boba batubami. Tumba nyutsananga nenu. Mbana dujaba yiri Fumu Mabadi amansindiga ombu genu.

¹⁶ Juda umueba buFumu bubulongu abu amasola va julu vana Jerusalem umuesolu nandi.

¹⁷ Mutu uotsu abi sui va gusu Fumu! Urambuga erambuyi o mbura andi jiNsambi!