Zacharie 14 - La Sainte Bible en Langue Yipunu

Divita diusita na durugu duFumu

¹ Yilumbu yikabu jiFumu uruga yiruyi. Bisi Jerusalem va misu menu bogabinina abienu.

² Nyugukiga bisi malongu botsu utumuna Jerusalem: musiengi upatulu, mandagu mokindu, bagetu bobivusu; dikabu dimosi dibisi musiengi diubegu bakoli tumba bansialutsu bosiala o musiengi.

³ Fumu olabana na otoyisa malongu meni nana etoyili mu yilumbu yidivita.

⁴ Muna yilumbu yieni oretsama va julu mukongu uMiolive upasu va gari, ubandila o yiari ayi wisi epalili te no yiari ayi wisi ewendisini, va gari voba yibususu yineni: yiasi yimosi yimukongu yiuvindama o yiari yibanda, yiasi yisusu yiumata o yiari yitandu.

⁵ Va temu eni durina o yibususu ayimatimu va gari mikongu; yibususu ayiutola te no Assal. Durina dedi mosi nana dumarinina disisana dibutamba va temu Ozias, kaga jiJuda. Mbana Fumu Nsambi ami oruga nabiansa biandi biotsu biuruga nandi.

⁶ Muna yilumbu yieni vagoba yijalala; vagoba yiotsi nesi mfula jimamanyi.

⁷ Va temu aji Fumu buandi ejabi; jiuba yika yijalala na yijalala yilumbu yieni yigoba nesi yijalala nesi pisama nesi tsisiga, yijalala yiubanganga.

⁸ Muna yilumbu yieni yileka yimonyu yiupalila o Jerusalem, mamba mamosi movindama o mubu aguvu o yiari ayi wisi epalili mamosi movindama o yiari ayi wisi ewendisini. Vagoba duviakusunu va gari mfula na mangala.

⁹ Fumu oba kaga jibutamba buotsu; mu yilumbu yieni Nsambi oba umosi buandi na diina diandi buandi diusambulungu.

¹⁰ Bulongu buotsu bukaluga nderi kumu ubandila o Gueba te no Rimmon, te no tandu Jerusalem; Jerusalem umatusu na ubanganga va mbura andi ubandila o dikotulu diBenjamin te no mbura jidikotulu ditega nesi te no dikotulu diyitungu nesi ubandila o ndagu jisakama jiHananeel te no bigamunu bikaga.

¹¹ Botsana muna na bagomueba na milogu, Jerusalem ubanganga sui.

¹² Guluanu yivunga ayi Fumu onamusu batu botsu abotoyisa Jerusalem: nyuru tsiogu tsiubola ava bakavu diteli; misu mogu mosundila ubola; ndimi tsiogu tsiubola mu miunu miogu.

¹³ Muna yilumbu yieni Fumu obalasa goma jineni; umosi ogagana na ususu, mutu umosi otoga na mutu nandi.

¹⁴ BaJuda botoga ugaga Jerusalem. Bogukiga busina bumalongu motsu masusu, nesi lora nesi lora jivema nesi biduaru bipuela.

¹⁵ Bibulu biotsu bimilaku mibavinitsi nesi bakabala nesi balumi bababuru nesi basamo nesi bibusi bibaburu biunamu yivunga ayiuba dedi na ayitega.

¹⁶ Botsu abosiala o malongu motsu abamayetoyisa Jerusalem bowendanga yilima na yilima uyeyitsa Fumu aguvu kaga jiMabadi uyejanganga feta jimasamba.

¹⁷ Pa vavu mikuta va butamba amigewendi o Jerusalem uyeyitsa Fumu aguvu Kaga jiMabadi, mfula jiogmuenoga o biari biogu.

¹⁸ Pa bisi Egypte bebusi uwenda o Jerusalem uyeji feta masamba bonamu yivunga ayi Fumu onamusu bisi malongu abagowenda. Mfula jigonoga o biari biogu.

¹⁹ Aguna uba mukilu uEgypte nesi mukilu umalongu motsu amebusi uyeji feta jimasamba.

²⁰ Muna yilumbu yieni bobaka bangunga babakabala rie: Yingitsi yiFumu! Mambiji amavu o Ndagu Nsambi moba yingitsi dedi na mamoyi na malungu amavu va gusu yinyensulu yipagu.

²¹ Mambiji motsu amavu o Jerusalem no Juda mowakusu ombu Fumu Mabadi, botsu abovagula pagu bomasalilanga ulambila banyama. Muna yilumbu yieni vagomueba batiyitsi bamuteti.