Zacharie 13 - La Sainte Bible en Langue Yipunu

¹ Muna yilumbu yieni yileka yiudibulila ayiliomisa masumu na muinsi bibategula baDavid na bibisi Jerusalem.

Nsambi otsiemusa bakosi na babiyitsi bamfurulu

² Muna yilumbu yieni menu Fumu Mabadi nyivosi rie: Nyutsiemusa bakosi o bulongu yiri bagomuerangumunu. Nyugusula abekenengila babiyitsi wandi nesi binyunyi bibi.

³ Pa mutu omuebiga, taji andi na nguji andi bomutsingula rie: Gufu mu mbari guifuri mu diina diFumu! Nesi taji andi nesi nguji andi omunonga dijenga ava obiyila.

⁴ Muna yilumbu yieni babiyitsi bolaba yisonyi mu diambu dibiriariamu biogu ava bobiyilanga; bagomuelinga na yijungi yimionyi yibuvagulitsi uyenadunsanga batu.

⁵ Mutu mutu va gari ogu ovosa rie: Ngaa mubiyitsi, nyivu mufutsitsi umanungi mami ubandila vana bungebi buami.

⁶ Na pa bomuwivula rie: Dibandu yi tulu agu jivu na mapura? Owaka rie: Nyimanemu-su o ndagu batu abamatondanga.

Fumu amajabunu avu Nsambi

⁷ Fumu Mabadi evosi rie: Dijenga, retsama, toga na mubungulitsi nesi na dibaala adivu mbatsi ami! Boka mubungulitsi yiri bindombu biupansiga! Nyuwamusa abideda.

⁸ Fumu amabuela rie: Mu bulongu buotsu makabu mabeji mu marieru mobokusu, dikabu adimurieru diusiala.

⁹ Nyukotisa dikabu dieni o muji udiliomisa nana beliomisili lora jivema, nyudipitsa nana bepitsili lora jivema, nyudipitsa nana bepitsili lora. Mbana diundengila na nyudiwagula; nyuvosa rie: Abana bavu batu bami! Jogu bovosa rie: Fumu avu Nsambi etu.