Zacharie 12 - La Sainte Bible en Langue Yipunu

Ukanda na dujegusu biJerusalem

¹ Bulumbi buFumu mu diambu dibaIsrael. Fumu agumawala julu nosunda yibuga yibutamba na agumakotisila mutu yinyunyi jandi rie:

² Nyuvaga Jerusalem nderi dimoyi adiutsiengisa batu botsu misu, jogu abetsani yiari na yiari na bisi Juda wandi abetsani o Jerusalem.

³ Muna yilumbu yieni nyuvaga Jerusalem nderi dimanyi ditsira ombu batu botsu; botsu abodinangula botsunguga. Malongu motsu mogukama utoga nandi.

⁴ Menu Fumu nyivosi rie: Muna yilumbu yieni nyulasa bakabala botsu goma na babeyitsi bogu botsiengila misu; nyuba watsi o ndagu Juda tumba nyuvaga bakabala babatu basusu bidunga.

⁵ Basefu baJuda botasa rie: Bisi Jerusalem bavu mangolu mogu ombu Fumu Mabadi aguvu Nsambi ogu.

⁶ Muna yilumbu yieni nyuvaga basefu baJuda nderi matsuga va gari mikansu, nderi paga ajimabangusu va gari bilonga; bosielasana batu botsu abavu o yiari yimabaala nesi ayimagetu. Tumba bisi Jerusalem boba sikiri va mbura ogu.

⁷ Fumu olegobula mikuta miJuda yiri bategula baDavid na bisi Jerusalem bagotasa yiri beviolili baJuda basusu.

⁸ Muna yilumbu yieni Fumu obamba bisi Jerusalem na agudeda va gari ogu; aguna oba na mangolu nderi David; bategula baDavid bogengulu nderi Nsambi, nderi yiansa yiFumu jaʼ beni.

Bukuili o bulongu buotsu

⁹ Muna yilumbu yieni nyumanina mangolu ubunga malongu motsu amoyetoyisa Jerusalem.

¹⁰ Mbana nyuwitilila bategula baDavid na bisi Jerusalem Yinyunyi ayiubarombisa uba na murima uvaganga maboti nesi usambilanga. Mbana bokengila, menu agu bamatoba. Bondila ava botangiminanga nana belilili muana divingu, bondila nana belili muana dibaala utsomi.

¹¹ Muna yilumbu yieni bukuili buba buneni o Jerusalem nderi bukuili buHadad-Rimmon o yibususu yiMeguiddo.

¹² Bulongu buba o bukuili, mukuta mukuta va mbura andi: Mukuta uDavid va mbura andi, bagetu va mbura ogu; mukuta uNatan va mbura andi, bagetu va mbura ogu.

¹³ Mukuta uLevi va mbura andi, bagetu va mbura ogu; mukuta uChimei va mbura andi, bagetu va mbura ogu.

¹⁴ Mikuta miotsu misusu, mukuta mukuta va mbura andi, bagetu va mbura ogu.