Zacharie 11 - La Sainte Bible en Langue Yipunu

Mangolu maneni mamabetsu

¹ Liban, dibula biabutsu biagu yiri muji unyensa mi sedera!

² Misipara lilanu, mu mbari misedera mimaberuga! Misena miBachan lilanu mu mbari musiru agusamalekotungu umabungu!

³ Babungulitsi bamalila mu mbari bundumba buogu bumabungu; baana babimbungu bamagumba mu mbari kembu jiJourdain jimabungu.

Babungulitsi babeji

⁴ Yilumbu yimosi Fumu Nsambi ami amatuma rie: Bungula bindombu abimasolu uboku!

⁵ Jogu abebisumbi bebiboki, tsiri ukilusu; jandi oyibisumbisi evosi rie: Diboti ombu Fumu mu mbari nyimadila busina! Babungulitsi bogu bagebawaki kalala.

⁶ Fumu amavosa rie: Nyisaa na yingeba ulasa bisi bulongu buebubu. Guluanu nyiwakisi babaala ombu umosi vo ususu nesi ombu kaga. Bakaga bobunga bulongu na ngowaka ne mutu mosi kalala.

⁷ Mbana nyukevega ubungula bindombu abimasolu uboku. Nyuromba konduku beji. Nyuluga dumosi: Maboti na nyuluga dususu: Dinonga. Mbana nyubungulanga bindombu.

⁸ Nyimagusula babungulitsi barieru mu tsungi jimosi; nyimatogulu nogu na jogu wogu bamatogulu nami.

⁹ Mbana nyimavosa nogu rie: Ngomuedubungulanga! Ayiwendi o ufu, yifuangingi; ayiwendi o ubungana, yibunginingi; abesiali, bijangisiningi!

¹⁰ Nyimabonga dukonduku duami aduinengulungu: Maboti na nyimadubogula, ulasa yiri pangini ami aji nyimavangana na batu botsu jimabunsu.

¹¹ Jimabunsu muna yilumbu yieni; bindombu abimakengila bimajaba yiri bisalu biami bimaruyila ombu Fumu.

¹² Nyimabatsingula rie: Pa duilabi diwelimina, peyianu futa ami; pa dugerondi duyajipega. Kabogu bamatala magumarieru mambongu tsilora jivema tsivema umfuta.

¹³ Fumu amatuma rie: Tsibuayili musulumusitsi. Futa eni bamalaba jiwelimina ufuta! Kabogu nyimabonga magumarieru mambongu tsilora tsivema, nyimatsibuayila musulumusitsi o Ndagu Fumu.

¹⁴ Mbana nyimabogula dukonduku adumubeji, aduinengulungu: Dinonga, ulasa yiri dinonga dibaJuda na baIsrael dimapansiga.

¹⁵ Fumu amatuma rie: Muebonga bisalulu bimubungulitsi aguvu yiduka!

¹⁶ Nyutinda mubungulitsi ugona o bulongu: agugokipa bindombu abibungini; agowenda uyenaromba abikivu baana, agobuga abimanemusu, agowarisa abivu buranga. Ojanganga abivu bivonga nesi uvopula birodi biogu.

¹⁷ Ka muna maguga ma ombu mubungulitsi aguvu yiduka! Aguisili bindombu biandi! Divita ditabuli miogu miandi nesi mangolu mamisu mandi! Gogu andi uivoli disu diandi dimabaala ditsimi!