Zacharie 10 - La Sainte Bible en Langue Yipunu

Sambilanu Fumu, duyasambila bakosi

¹ Wondanu mfula ombuFumu, mfula jimutubu! Fumu opalisa tsiemu nodutindila mfula jineni, obendisila mutu mutu bivaru o nungi andi.

² Bakosi aba duisambili bedufuri, bavanditsi bedubiyili mamfurulu, mandosi ama bewaluli magaa na tsongu. La dibandu batu bavu yiari na yiari nderi mugamba, bamakambulu mu mbari bagaa na mubungulitsi.

Pangini tsidujegusu

³ Nyimanyoyilababungulitsi babindombu bangana tindi kabu abefuri uwendisa batu bami; nyubakilisa. Nyiina, menu Fumu Mabadi nyidivosi. Nyulingula mugamba ami, baJuda. Nyubabega o divita nderi kabala jibundumba.

⁴ Va gari ogu vopalila: dimanyi adivu na tsongu; disoluku dindagu tsanda; pita jidivita; basefu botsu.

⁵ Boba nderi bangogaga o divita abotsiarila bavinitsi nderi mutu etsiarili diobu mu mbari Fumu oba nogu. Babeyitsi babakabala bangana bolasu yisonyi.

⁶ Nyuwarisa baJuda na nyuwaka baIsrael kalala; nyubagabusa o mbura ogu na nyubalasa durondu duami nderi nyisamalebabusa. Nyumuebawagula mu mbari nyivu Fumu Nsambi ogu.

⁷ BaEfraim boba nderi bangogaga; mirima miogu miubasa na nsangu nderi nsangu jimalamu. Bafudu bogu bojilaba na bosangila; bosangila Fumu.

⁸ Nyunengila batu bami nobagukiga mu mbari nyimatabula diambu ubajeyisa. Boba bapuela bapuela nana na kala.

⁹ Nyubapansa o malongu nana bekukili tsangu tumba o vala mbana bptangimina, jogu na baana bogu bodila monyu na bogabuga.

¹⁰ Nyubagabusa o bulongu buEgypte na nyubagukiga o Assyrie; nyubagabusa o bulongu buGalaad na buLiban, tumba vagoba mbura jiwelimina nogu.

¹¹ BaIsrael bovioga mubu, mubu umaguga, bodiamisa mibiji mimubu, mujamba uNil ukamuga; dunangu duAssyrie dudiamusu na muansu ubunsonsi uEgypte utsiemuga.

¹² Nyuwarisa batu bami bovaganga amondasa ubueji, menu Fumu oyidivosi.