Zacharie 1 - La Sainte Bible en Langue Yipunu

BIRIARIAMU BIZACHARIE Fumu unengila enengili baIsrael

¹ Mu tsungi jimusiamunu mu yilima yimubeji yidurumu duDarius Fumu amatsingula Zacharie mubiyitsi, muana dibaala uBerekia mutegula uIddo rie:

² Nyimanyoga tindi unyoyila bataji benu.

³ Kabogu, batsinguli rie: Fumu Mabadi jandi rie: Ruganu ombu garni yiri nyugabuga ombu genu, adina nyivangini nenu.

⁴ Duyaba nana bataji benu. Babiyitsi batega bamandembiyilila ubusa bisalu biogu bibi nesi bifu biogu bibi! Basamaronda ukulu na basamandedila.

⁵ Bataji benu baka? Babiyitsi baki monyu?

⁶ Tumba mambu mami na maruma mami abi nyimavega basalitsi bami babiyitsi, bataji benu basamabigulu. Bamandiyila nsima na bamajaba yiri nyimabavayila nana nyimarondila mu diambu dibisalu biogu nesi bifu biogu.

Yiriariamu yitega: bakabala

⁷ Mu yilumbu yimagumabeji na bina bitsungi jiyigumi na mosi, tsungi jiChebat mu yilima yimubeji yidurumti duDarius, Fumu amatsingula Zacharie mubiyitsi, muana dibaala uBerekia mutegula uIddo rie:

⁸ Mukolu eni nyimalaba yiriariamu. Muna nyimalaba dibaala adimavindamanga va julu kabala jibenga mbana amaba diteli va gari yivosi yimirita amimaba mipuela mipuela o yibususu; va nsima andi vamaba bakabala babenga nesi badutsungu nesi bavema.

⁹ Nyimamuwivula rie: Fumu yina yi? Yiansa ayimavosa nami yimansingula rie: Nyuguvindiyila yionyi.

¹⁰ Dibaala adimaba diteli va gari mirita amavosa rie: Abana Fumu amasindiga utsiengila bulongu.

¹¹ Mbana bebeyitsi babakabala bamavosa na yiansa rie: Tumatsiengila bulongu, tutsilaba yiri bulongu buotsu buvu na yivumu na bavu sui.

¹² Mbana yiansa yimavosa rie: Fumu Mabadi tuka magumidusambuali mabilima yiotsu ayi gumanyoyila Jerusalem na misiengi miJuda kabu. Te na temu yi gumigalisila murima?

¹³ Fumu amawaka yiansa ayimavosa nami mambu maboti na mambembugulu.

Fumu omuesola Jerusalem

¹⁴ Yiansa ayimavosa nami amatuma rie: Gamuga rie: Fumu Mabadi jandi rie: Nyina diwavi dineni mu diambu diJerusalem na dimukongu uSion,

¹⁵ tumba nyimanyoyila malongu amavu na dunangu kabu jineni. Diuleba nyimalemanyoyila kabu jigeyi mamarombisa dubungu du-uonyi.

¹⁶ La dibandu menu Fumu Mabadi nyivosili rie: Nyugabuga na yingeba o Jerusalem uyilasa maboti mami. Ndagu ami jiumuerungululu na bomuerungulila musiengi.

¹⁷ Yiansa yimatuma umuevosa rie: Fumu Mabadi jandi rie: Misiengi miami miumueba na digumba; nyumuesola Jerusalem, nyuwaka Sion kalala.