Ukumuga 8 - La Sainte Bible en Langue Yipunu

¹ Fumu amatsingula Moise rie: Ruma Aaron rie: Samba gogu agu na nguangu agu mu mijamba mineni nesi migeyi, na mu manga nobasa milansa o bulongu buotsu buEgypte.

² Aaron amasamba dikaka diandi mu mamba motsu maEgypte; milansa mimamata na mimabasa bulongu buEgypte.

³ Tumba banganga baEgypte bamavaga munongu mosi na bingana biogu. Bamabasisa milansa o bulongu buEgypte.

⁴ Pharaon amanengila Moise na Aaron na amavosa rie: Sambilanu Fumu yiri okakasana milansa nami na batu bami; mbana nyuwensa baIsrael uyevagulila Fumu ogu pagu.

⁵ Moise amatsingula Pharaon rie: Ndeʼ beni gukansingula temu aji guirondi yiri nyusambila Fumu mu diambu diagu na dibasahtsi bagu na dibatu bagu yiri okakasana milansa vala nagu na mandagu magu, miusiala yika o Nil.

⁶ Pharaon amawagula rie: Mugesa. Moise amavosa rie: Anana diubila mbana gujaba rie: Vagaa mutu ne umosi aguibagunu na Fumu Nsambi etu.

⁷ Milansa miukakana nagu na mandagu magu wandi na basalitsi bagu na batu bagu; miusiala yika o Nil.

⁸ Moise na Aaron bamapala o ndagu Pharaon. Mbana Moise amatatila Fumu mu diambu dimilansa amimakambisa Pharaon.

⁹ Fumu amavaga adi Moise amamuwivula; milansa amimaba o mandagu no ndombili no manungi mimafu.

¹⁰ Bamamigukiga maguki mapuela mapuela na bulongu buotsu bumaba yika mbunga na mbunga jibi.

¹¹ Pharaon anolaba mukilu eni amamuegalisa murima andi na asamagulu mambu maMoise na Aaron nana Fumu amabalubusila.

Yivunga ayimurieru: Batsina

¹² Fumu amatsingula Moise rie: Ruma Aaron rie: Bonga nguangu agu, dimba difufundu, diukaluga batsina o bulongu buotsu buEgypte.

¹³ Moise na Aaron bamadivaga. Aaron amasamba gogu andi na amadimba difufundu nguangu andi; dionyi dimakaluga batsina abimagaka nesi batu nesi bibulu. Difufundu dimakaluga batsina o bulongu buotsu buEgypte.

¹⁴ Diuleba banganga baEgypte bamasalisa bingana biogu basamarungula uvaga yimaga yibatsina. Batsina bamagakanga nesi batu nesi bibulu.

¹⁵ Banganga bamatsingula Pharaon rie: Dionyi diruyili ombu Nsambi! Pharaon amagalisa murima andi, asamagulu mambu maMoise na Aaron nana Fumu amabalubusila.

Yivunga ayimuina: Biragala

¹⁶ Fumu amatsingula Moise rie: Rambuga kedi jineni uyelabana na Pharaon, ava owendila o mujamba. Gukamuruma rie: Fumu jandi rie: Dunda batu bami yiri bonsalila.

¹⁷ Pa gugodunda batu bami, nyutinda biragala ombu gagu; mandagu mabisi Egypte mobasa de na biragala, na butamba buotsu buba yika biragala na biragala.

¹⁸ Tumba muna yilumbu yieni yiari yiGochen yigoba muna ayi batu bami betsanini, aguna ugolabana ne yiragala yimosi; mbana gujaba yiri menu Fumu oyitsani nogu o bulongu buebubu.

¹⁹ Nyuvaga duviakusunu va gari batu bami na batu bagu. Mugesa yimaga yiulabana.

²⁰ Fumu amavaga nana amavosila; dibumba dibiragala dimabasa ndagu Pharaon na mandagu mabasalitsi bandi, na bulongu buotsu buEgypte bumakutu na biragala.

²¹ Pharaon amanengila Moise na Aaron, amabaruma rie: Wendanu yevagulilanu Nsambi enu pagu o bulongu buebubu.

²² Moise amawagula rie: Digaa diwelimina uvaga nana mu mbari tuvagulila Fumu Nsambi etu pagu, tsionyi tsiuba nsoruru ombu bisi Egypte. Yika tsie pa tuvagulila pagu atsiuba nsoruru ombu bisi Egypte, jogu bagotutindila mamanyi?

²³ Tuvaga bilumbu birieru biuwendila o kumu, tuvagulila Fumu Nsambi etu pagu, nana Fumu otutsingulila.

²⁴ Pharaon amavosa rie: Nyudusingisa uwenda uyevagulila Fumu Nsambi enu pagu o kumu; dimosi buandi duyaweʼ vala na nsambililianu wandi.

²⁵ Moise amawagula rie: Nyulepala o ndagu agu mbana nyusambila Fumu. Mugesa biragala biugusuga ombu Pharaon nʼombu basalitsi bandi. Dimosi buandi Pharaon ayatudunsa; awensi baIsrael uyevagulila Fumu pagu.

²⁶ Moise anopala o ndagu Pharaon amasambila Fumu.

²⁷ Fumu amavaga adi Moise amamuwivula; biragala bimagusulu ombu Pharaon nʼombu basalitsi bandi nʼombu batu bandi, vasamasiala ne yimosi.

²⁸ Ne nana Pharaon amamuegalisa murima andi, asamawensa baIsrael.