Ukumuga 6 - La Sainte Bible en Langue Yipunu

¹ Fumu amatsingula Moise rie: Namapapa gulaba adi nyuvayila Pharaon; mangolu mami momutsotsa uwensa baIsrael, mangolu mami momutsotsa nesi ubabinga o bulongu buandi.

Fumu uvangana evangini na Moise uwaka baIsrael kalala

² Nsambi amamuevosa na Moise rie: Menu la Fumu!

³ Nyimalelabana ombu Abraham nʼombu Isaac nʼombu Jacob na diina diNsambi Mangolu; tumba basamanjaba na diina diami diFumu.

⁴ Nyimavangana pangini ami nogu wandi ubavega bulongu buCanaan, bulongu abu jogu bamatsaninanga nana balinsi.

⁵ Menu ugulu nyigulu bibimu bibaIsrael, bibuviga abu bisi Egypte bebakelisi. Nyurungula ulibana pangini ami?

⁶ Kabogu tsingula baIsrael rie: Menu la Fumu! Nyulengasana bisalu abi bisi Egypte bedutsoyisili, nyuduwaka kalala o buviga buogu. Na mangolu mami nyubakilisa na mukilu agulabana ava nyudujeyisila.

⁷ Nyuduvaga batu bami, nyuba Nsambi enu. Mbana dujaba yiri menu Fumu nyivu Nsambi enu agumalengasana bisalu abi bisi Egypte bamadutsoyisila.

⁸ Menu Fumu nyudukotisa o bulongu abu nyimavangana uvega ombu Abraham nʼombu Isaac nʼombu Jacob; menu Fumu nyuduvega bulongu abu nyimavangana uduvega.

⁹ Anana Moise amayetsingulila baIsrael tumba basamamugulu mu diambu digoma na ditsoga dibuviga.

¹⁰ Fumu amamuevosa na Moise rie:

¹¹ Wenda, yetsingula Pharaon, kaga jiEgypte, rie: Dunda baIsrael; bagusuyi o bulongu buagu.

¹² Moise amawagula Fumu rie: Lesa baIsrael bamabusa ukulu tambusa na Pharaon; menu aguvu na mbembu jirekama?

¹³ Fumu amavosa na Moise na Aaron na amabavega maruma mu diambu dibaIsrael na diPharaon kaga jiEgypte. Amaruma rie: BaIsrael bagusuyi o Egypte.

Miina mabategula baMoise na Aaron

¹⁴ Amama la miina mabasefu bamikuta miogu: baana bababaala baRuben, tsomi Jacob: Hanok na Pallou na Hesron na Karmi, amina la mikuta miRuben.

¹⁵ Miina mabaana bababaala baSimeon amama: Yemouel na Yamin na Ohad na Yakin na Sohar; na Chaoul muana udibaala umuisi Canaan. Amina la mikuta miSimeon.

¹⁶ Amama la miina mabaana bababaala baLevi nana bamaburulu: Guerchon na Quehat na Merari. Yitsingu yiotsu yiLevi yimaba kama na magumarieru na yisambuali yibilima.

¹⁷ Miina mabaana bababaala baGuerchon amama: Libni na Chimoi na mikuta miogu.

¹⁸ Miina mabaana bababaala baQuehat amama: Amram na Issar na Hebron na Ouziel. Yitsingu yiotsu yiQuehat yimaba kama na magumarieru na bilima birieru.

¹⁹ Miina mabaana bababaala baMerari amama: Mali na Mouchi. Amimi la mikuta miLevi na bategula bandi.

²⁰ Amram amawela Yokebed agumaba taji andi ketu, amamuburila Aaron na Moise. Yitsingu yiAmram yimaba kama na magumarieru na yisambuali yibilima.

²¹ Miina mabaana bababaala balssar amama: Core na Nefeg na Zikri.

²² Miina mabaana bababaala baOuziel amama: Michael na Elissafan na Sitri.

²³ Aaron amawela Elicheba muana mugetu uAmminadab yibusi yiNachon na amamuburila Nadab na Abihou na Elazar na Itamar.

²⁴ Miina mabaana bababaala baCore amama: Assir na Elcana na Abiassaf, amina la mikuta mibaana bababaala baCore.

²⁵ Elazar muana dibaala uAaron amawela muana mosi uPoutiel, amamuburila Pinhas. Amana la miina mabasefu babaana bababaala baLevi na mikuta miogu.

²⁶ La Aaron eni na Moise eni aba Fumu amaruma rie: Palisanu baIsrael o bulongu buEgypte muna mukuta mukuta.

²⁷ Jogu bamavosa na Pharaon, kaga jiEgypte rie: Palisa baIsrael o bulongu buEgypte. Tsiri basusu abamadivosa, Moise na Aaron.

Nsambi uwarisa ewarisi pangini andi na Moise

²⁸ Ava Fumu amavosila na Moise o bulongu buEgypte,

²⁹ amamutsingula rie: Menu la Fumu, tsingula Pharaon, kaga jiEgypte motsu ama nyugutsingula.

³⁰ Moise amawagula Fumu rie: Aa! Nyina mbembu jirekama. Yika tsie Pharaon okululu?