Ukumuga 2 - La Sainte Bible en Langue Yipunu

Duburu na bungebi buMoise

¹ Muisi Levi amawela muana mugetu uyifumba yiLevi.

² Mugetu eni amadila dimi na amabura muana dibaala. Amalaba yiri umaba uboti, amamusuega te na tsungi yirieru.

³ Anojaba yiri agomuerungula umusuega kabogu amabonga tsansi aji amasinga bituma na maka; amapodula muana muna nomudibiga, amajiputiga o mamba va gari bilelenga va mugula umujamba Nil.

⁴ Yibusi yimuana eni amasuema mua vala, ukelisa muana.

⁵ Muana mugetu uPharaon amawenda o Nil na bambatsi bandi uyebuila, bamayenalinganga va mugula mujamba. Jandi amalabilila tsansi va gari bilelenga, amasindiga musalitsi andi umugetu uyejibonga.

⁶ Anodibula tsansi, amalaba muana dibaala agumalilanga. Amalaba yingeba, amagamuga rie: Kayia! Muana ubaHebreu!

⁷ Mbana yibusi yimuana eni amawivula muana mugetu uPharaon rie: Tsie nyiyegurombila mubusi va gari bagetu baHebreu umunuisa?

⁸ Muana mugetu uPharaon amamuwagula rie: Diwelimina. Muana eni umugetu amayelanda tindi nguji muana.

⁹ Muana mugetu uPharaon amamutsingula rie: Yenduisila muana egugu; nyugufuta. Nguji muana amamubonga, amayemunuisa.

¹⁰ Muana anobanguga, nguji andi amamubega ombu muana mugetu uPharaon, agumamukelisa tindi muana andi. Amamuluga Moise, mu mbari amavosa yiri nyimamupalisa o mamba.

Moise urina erini o bulongu buMadian

¹¹ Yilumbu yimosi, Moise anobanguga, amayenalinganga o yiari ayi baIsrael bamatsaninanga, amalaba bisalu biogu biranga. Amalaba muisi Egypte agumadimbanga muisi Hebreu umosi ubaana bataji bandi.

¹² Moise amagengila yiari na yiari, asamalaba mutu ususu kabogu amaboka muisi Egypte na amafundiga mfumbi mu yisieyi.

¹³ Amamuelinga yilumbu yisusu; amalaba baHebreu babeji utsunda betsundi. Amawivula jandi omaba na mbela rie: Mu mbari yi guidimbili mutu nagu?

¹⁴ Dibaala dieni amamugabusila rie: Anyi amaguvaga yivunda na nsonsi va gari etu? Guirondi umboka nana gumabokila muisi Egypte? Moise amalaba goma na amavosa rie: Kabogu diambu dimajabunu.

¹⁵ Pharaon amadijaba, amarombanga ubokisa Moise. Tumba Moise amarina Pharaon, amayesuema o bulongu buMadian, amatsana guna va mugula yiduna yimamba.

¹⁶ Muvagulitsi upagu, muisi Madian amaba na yisambuali yibaana babagetu abamawenda uyetega mamba; bamabasa bitegulu unuisa mugamba utaji ogu.

¹⁷ Mbana babungulitsi babindombu bamabarasuna na bamababinga. Kabogu Moise amabawaka kalala, jaʼ beni amanuisa mugamba ogu.

¹⁸ Ava bamagabuyila ombu taji ogu Jethro, amabawivula rie: Tsie divu yiri namunyi dugaatsinga?

¹⁹ Bamamugabusila rie: Muisi Egypte atsituwaka kalala ombu babungulitsi babindombu na atsituteyila mamba, atsinuisa mugamba.

²⁰ Jandi amawivula baana bandi babagetu rie: Aguʼ avu? Dibandu yi dutsisilila dibaala dieni? Munengilianu uyitsoka murima.

²¹ Moise amatabula diambu utsana na dibaala dieni, omamuwetsa na muana andi Sefora.

²² Amabura muana dibaala agu Moise amaluga Guerchom, divindugulu rie: nyitsani o bulongu bungana.

Nsambi usola esoli Moise uwaka baIsrael kalala

²³ Yitsingu yineni yinovioga, kaga jiEgypte amafu, baIsrael ubima mbe bakibima o buviga; migamu miogu mibuviga mimagulunu te nʼombu Nsambi.

²⁴ Nsambi amagulu bibimu biogu, amakipanga pangini andi na Abraham na Isaac na Jacob.

²⁵ Nsambi amalaba buviga bubaIsrael na amabalaba yingeba.