Ukumuga 1 - La Sainte Bible en Langue Yipunu

NSAMBI UPALISA EPALISI BAISRAEL O EGYPTE Buviga bubaIsrael o Egypte

¹ Guluanu miina mabaIsrael, abamawenda na taji ogu Jacob o Egypte, na mukuta umutu mutu:

² Ruben na Simeon na Levi na Juda,

³ Issakar na Zabulon na Benjamin

⁴ Dan na Neftali na Gad na Asser.

⁵ Dutalu duotsu dumukuta uJacob dumaba magumidusambuali. Joseph amarela o Egypte.

⁶ Bilima bipuela binovioga Joseph amafu na baana bataji bandi botsu te na dukula dueni duotsu wandi.

⁷ BaIsrael bamaburasana na bamafuna, bamabanguga na bamabanganga na mangolu maneni. Bamabasa bulongu de.

⁸ Kaga jisusu amavinga uruma o Egypte ajisamalejaba Joseph.

⁹ Amatsingula batu bandi rie: Labatianu baIsrael bamafuna puela na bana mangolu uviolila jetu.

¹⁰ Tsie tubakambisianu; tubagubitsianu ufuna mu mbari pa voruga divita, bakefubana na bavinitsi betu ututoyisa, va julu vana bakegusuga mu bulongu buetu.

¹¹ Bisi Egypte bamabavega bivunda bibisalu, abimabakuananga na bisalu biranga. Anana baIsrael bamarungila misiengi miPitom na Ramses, amimabanganga bisuegulu biPharaon.

¹² Diuleba bamabakuananga, bamafuna uviolila na bamabasa biari biotsu; la dibandu baIsrael bamalabulu goma.

¹³ Mbana bisi Egypte bamatsoyisa baIsrael tindi utsoyisa nobakotisa o buviga.

¹⁴ Bamabalasa maguga na bisalu biranga: bidiga na bibirika na bisalu biotsu bimusiru. Bamabatsotsa bisalu bieni biotsu na bukisi.

Pharaon ukuana ekuani baIsrael

¹⁵ Va julu vana, kaga jiEgypte amavega diruma ombu baburisitsi abamaburisanga baHebreu, umosi diina diandi Chifra, na ususu diina diandi Poua.

¹⁶ Amabaruma rie: Ava duburisila bagetu baHebreu, pa uvu muana dibaala, mubokianu; pa uvu muana mugetu duyamuboka.

¹⁷ Tumba baburisitsi bamaduma Nsambi, basamadedila adi kaga jiEgypte amabaruma; basamabokisa baana bababaala.

¹⁸ Kabogu kaga jiEgypte amanengila baburisitsi, amabawivula rie: Dibandu yi dutsivayila nana? Dibandu yi dugaabokisila baana bababaala?

¹⁹ Baburisitsi bamawagula Pharaon rie: Mu mbari bagetu baHebreu bagaa nana bagetu baEgypte; jogu bana mangolu, yiotsu ayi muburisitsi etolili bekeburila.

²⁰ La dibandu baIsrael bamaviolila ufuna. Va julu vana Nsambi amawamusanga baburisitsi;

²¹ amabafunisila bategula mu mbari bamadedila Nsambi.

²² Mbana Pharaon amaruma diruma diedidi ombu batu bandi botsu rie: Muana uotsu udibaala uHebreu dukabuaga o mujamba uNil, yika baana babagetu dukelisa.