Tite 3 - La Sainte Bible en Langue Yipunu

Nsanunu jibatu baNsambi

¹ Balubusi ukesunsa o tsi durumu dubarumitsi na abavu na musuga; babadedili na babasalili wandi.

² Balubusi wandi yiri bayagela batu na bayaba na mitsundu tumba babi sui na babi mavolambombu.

³ Jetu wetu tumaleba biduka tusamaba na dululu vo ndunga. Tumaleba baviga bansala tsietu. Tumaleba balensitsi abamawavanga.

⁴ Yiotsu ayi maboti maNsambi, Mugobutsi etu, na durondu duandi ombu batu bimalabinina

⁵ jandi amatugobula. Tusamagobulu mu diambu dibisalu biboti abi tumasala tumba mu diambu diyingeba yiandi tumagobulu ava tumaliomusulu na Yinyunyi yiNsambi oyiveyi duburu dugona nesi monyu ugona.

⁶ Mu mbari Nsambi amatuvega Yinyunyi yiandi ne uviosulila mu diambu diJesus Christ Mu gobutsi etu.

⁷ Mu diambu dimaboti mandi tumasungugu na Nsambi na tumadila monyu unjutubu agu tumaletasila.

⁸ Motsu mana mavu mangensa. Nyirondi yiri ndeʼ guwarisa mambu memama yiri jogu abamavayila Nsambi yitu bokevega usala bisalu biboti. Amana mavu maboti na mawelimina.

⁹ Tumba busa mitsu ndu mikulini nesi bukulu na duyatoga mu diambu dimotsu mana amagaa na tsongu.

¹⁰ Mu diambu dimutu oyipansi batu mulubusi ne temu beji mbana kakana nandi.

¹¹ Guijabi yiri munongu eni amabiva na masumu mandi memuveyi mbela.

Malongi amosita

¹² Ava nyusindiyila Artemas vo Tychique ombu gagu, lensa noruga gukatasuna o Nicopolis mu mbari nsitabula diambu uviosila mangala vana.

¹³ Lensa nosindiga Zenas, ojivu mulonsi umigaga na Apollos wandi. Bawamusi na muendu yiri bagogambu na yima.

¹⁴ Batu betu bewiji usala bisalu biboti nowamusa abavu mu maguga; bayatsora.

¹⁵ Botsu abavu nami begutindili mambolu. Vega mambolu ombu jogu botsu abamafubana mirima netu. Maboti maNsambi mabi nenu!