Sophonie 3 - La Sainte Bible en Langue Yipunu

Jerusalem usamagulu diufi diNsambi

¹ Ka muna maguga ma o Jerusalem musiengi umimbini agumabivusu na bakuanitsi!

² Ugegulu mambu maFumu, ugekipi malubu mandi! Ugekevega ombu Fumu, ugebambini na Nsambi andi.

³ Basefu bavu nderi bimbungu abigumbi; bansonsi bavu nderi baminsi batsisiga abagesueyi yima te na kedi.

⁴ Babiyitsi bagekipi na bagaa basigama; bavagulitsi bapagu besabuli bima biNsambi na besumuni migaga.

⁵ Diuleba Fumu aguvu usungama etsani o musiengi; kedi na kedi elasingi bisalu biandi biboti va yijalala, agedundi ubilasanga. Ne nana batu babi bagaa na yisonyi.

⁶ Fumu amavosa rie: Nyimagudisa malongu; mandagu mogu masakama mamapansu; nyimabunga mansila mogu, batu bagemuevioga! Misiengi miogu mimabungu, batu basatsi!

⁷ Nyimavosa rie: Jerusalem ukitsa, nokipa malubu mami. Mbana ngomuegubunga nogukilisa mikilu miotsu ami mbe nyimagukilisa. Tumba bisi uonyi bamaviolila uvaganga mabi.

⁸ Fumu amavosa rie: Kabogu pivianu, uruga nyiruyi ugutabulila bunsonsi nyimatabula diambu kala ugukiga bisi malongu ubalasa muji ukabu ami. Bulongu buotsu bunyensu na muji udiwavi diami.

Nsambi ovinsa batu mirima

⁹ Mbana nyuvinsa batu mirima na nyuliomisa bilila biogu; bonsambilanga menu Fumu na bonsalilanga na murima umosi.

¹⁰ O disimu dina dimijamba miEthiopie basigama bami na aba nyimapansa bomuembeyila pagu tsiogu.

Bansialutsu baIsrael

¹¹ Muna yilumbu yieni jenu batu bami dugomuelaba yisonyi na bisalu bienu biotsu abimaledurombisa uvaga masumu va gusu ami. Va temu eni nyudugusulila bango dunangu na vagomueba mimbirii o julu mukongu ami.

¹² Nyugusila dikabu dibageyi na divolambombu abokwivula ubasuega.

¹³ Bansialutsu baIsrael bagomuevaga mabi na bagomuefuranga na bagomueba na posulu tsindunsulu. Tumba bojanganga na bovumanga na mutu agobapupisa.

Nsangu jiJerusalem

¹⁴ Musiengi uSion, gamuga migamu minsangu! Bisi Israel, gamuganu migamu minsangu! Jerusalem sangila, sangila na murima agu uotsu!

¹⁵ Kaga Israel, Fumu amagusula mikilu mi agu, amakakasana na muvinitsi agu; Fumu avu nagu na gugomuelaba purulu.

¹⁶ Muna yilumbu yieni botsingula Jerusalem rie: Guyalaba keri! Botsingula Sion rie: Guyadeda!

¹⁷ Fumu Nsambi agu avu nagu, avu ngogaga ajiuguwaka kalala; olabanga nsangu jineni nagu; durondu duandi duguvega monyu ugona, ogamuga migamu minsangu mu diambu diagu,

¹⁸ nana begamuyili mu yilumbu yifeta. Fumu amavosa rie: Nyutsiemusa purulu na nyugugusulila yisonyi ayi guilabi.

¹⁹ Vana temu eni nyubunga bakuanitsi bagu botsu; nyuwaka bitsondu kalala na nyugukiga abamabingu o bulongu buotsu abu belabi yisonyi nyukalusa yisonyi yiogu duyitsu na bundumba.

²⁰ Va temu eni nyugugabusa; vana temu eni nyugugukiga; nyurombisa batu botsu ugulasa bundumba na digoba ava nyugugabusilila bakoli bagu.