Duimbu Adutviolili Nyimbu 7 - La Sainte Bible en Langue Yipunu

(Bagetu na banumba)

¹ Bamandengilanga rie: Sulamite gabuga, gabuga! Gabuga, gabuga yiri tugugengila! Dibandu yi duirondili ugengila Sulamite nderi duigengili bayinitsi bamalamu?

(Dibaala)

² Muana mugetu ukaga makulu magu masogana na bapondu bagu! Mipilingi miagu mivu na kembu dedi mosi na misanga amimavagu na tindi ngela.

³ Tulu agu jivu nderi dimoyi adigegambu malamu; moji agu uvu nderi diguki dible adimatsiengulu na felera.

⁴ Mabenyi magu mabeji mavu nderi baana babakabi nderi mavasa matsiesi.

⁵ Kingu agu jivu nderi ndagu jisakama ajimarungu na pungi; misu magu mavu nderi manga maHechebon amavu va mugula diguyi dimusiengi. Mbasu agu jivu nderi ndagu jisakama jiLiban ajisungasana o yiari yiDamas.

⁶ Muru agu uvu nderi dugaba aduibagunu na Carmel. Nanga tsiagu tsivu nderi yinyuru ayivu va gari ubenga na dumbulu; nesi kaga elabi ubueji utsibemba!

⁷ Ka muna muboti gu mbatsi ami! Guvu muboti, aguami udurondu edugusu nsala tsiami tsiotsu.

⁸ Ka muna yirela yi guibagunu na mbari, mabenyi magu mebagunu na biatsi.

⁹ Nyivosi rie: nyumata mbari, nyugaanga biatsi! Mabenyi magu mavu nderi bisaga birayisan mbunga jiyivumu yiagu jivu nderi mbunga jipoma.

¹⁰ Munu agu undasi nderi malamu maboti…! Nyiina, malamu maboti amamasuegulu aguami udurondu, na metuwendisi bilu.

(Mugetu)

¹¹ Nyivu u-aguami udurondu, nsala tsiandi tsikengili.

Ka muna ubueji gu urondungu (Mugetu)

¹² Aguami udurondu ruga, Tʼwendi o yiari yimanungi, tuyenatsana o mulaku!

¹³ Tuwenda muna kedi o nungi tsimfuga tsirayisan, tulaba pa mfuga tsieni tsibanguyi na pa migeranada mimawansa wandi. Avana nyugudugusulu nsala.

¹⁴ Mbunga jimandarago uvandumuga jivandumuyi. Tujanganga milunda miboti o ndagu etu nesi miyilima ayimavioga nesi miyilima yieyiyi. Aguami udurondu, ndeʼ nyimamisueyila.