Duimbu Adutviolili Nyimbu 6 - La Sainte Bible en Langue Yipunu

(Banumba)

¹ Mugetu aguiviolili botsu ubueji, aguagu udurondu agu avu? Yiari yi amawendasana? Tuguwamusa umuromba.

(Mugetu)

² Aguami udurondu amawenda o musaga andi ubima bimbunga jiboti uyenarombanga mugamba andi noyenadokulanga bafelera.

³ Menu nyivu u-aguami udurondu na aguami udurondu avu u-ami. Ebunguli mugamba andi o mbura tsibalisa.

Nana mugetu eni avu (Dibaala)

⁴ Mbatsi ami guvu tindi muboti nana musiengi uTirsa-Jolie nesi musiengi uJerusalem, bundumba buvu nana bubagora abavu bakunsama utoga divita.

⁵ Kokolu tsiagu dunda ukengila, yisuisu yiagu yimbatisi nsala. Nanga tsiagu tsivu nderi mionyi mibinʼsabi abivindimi o Galaad.

⁶ Minu magu mavu nderi mugamba bindombu abiruyili o yibususu, biotsu bilingi bibeʼ bibeji, va gari ogu vagaa puasasa.

⁷ O nsima dumbu duagu mabanga magu mebagunu na yisaga yigeranada.

⁸ Vavu magumasiamunu makaga tsibagetu, magumidunana mamaronda, na banumba bagaa durangu;

⁹ tumba dikunda diami avu dimosi buandi adi nyirondingi; avu divingu dinguji andi, agumamubura, amamurondanga. Banumba banomulaba bamavosa rie: Ka muna maboti ma mavu nandi! Bakaga babagetu na maronda bamavosa dedi mosi na bamamukakisa rie:

¹⁰ Anyi elabini nana matebugulu? Anyi avu muboti nana tsungi? Anyi eluli nana wisi? Anyi ana bundumba dedi mosi na bagora abavu bakunsama utoga divita?

¹¹ Nyimavindama o nungi milunda, uyelaba bivaru bigona o yibususu ulaba yeri mfuga tsirayisan jibendi na pa migeranada mimawansa.

¹² Mbe nyisakadijaba nsala tsiami tsimambega o makalu mabatu bami.