Duimbu Adutviolili Nyimbu 5 - La Sainte Bible en Langue Yipunu

(Dibaala)

¹ Mbatsi ami, nyikoti o nungi ami; nyidokuli mira na bima bimbunga jiboti, nyiji yisila yiami yibuji, nyinu malamu mami na dile diami. Bambatsi bami jianu; nuanu na langanu durondu!

(Bambatsi) Mugetu emudibulili diguyi, tumba temu jimakevioyila (Mugetu)

² Nyibetsi yilu, tumba murima ami yika bakaka. Nyigulu nduku aguami udurondu udukisa edukisi. Evosi rie: Mbatsi ami, dikunda diami, ndibulili! Nyimanogulu disala, nanga tsiami tsimabola.

(Dibaala) (Mugetu)

³ Nyimavula yilinga yiami; tsie nyumueyiduarila? Nyimasusa makulu mami; yika tsie nyumuemabivisila?

⁴ Aguami udurondu ekotisi dikaka va fenetera, nsala tsiami tsimati.

⁵ Nyimasundila usimbuga udibulila aguami udurondu ndagu. Makaka mami medekingi matsi mamira ava nyimagaangila digongi.

⁶ Nyimadibulila aguami udurondu ndagu; tumba asatsi, amakewendila. Nyimamuromba, nyisamamulaba; nyimamunengila, asamakwagula.

⁷ Bagora bamabenguna nami, bamandimba, bamandemisa; bamapula dumbu.

⁸ Banumba baJerusalem nyidulembiyili, pa dulaba aguami udurondu, diambu yi dumutsingula? Dukamutsingula, durondu nyibeli.

(Banumba)

⁹ Mugetu aguiviolili botsu ubueji yika tsie vagaa dibaala disusu yika aguagu udurondu? Diambu yi divu na aguagu udurondu adigurumi utulembiyila?

(Mugetu)

¹⁰ Aguami udurondu avu vedi vedi; eviolili yigumi yitosini ubueji.

¹¹ Muru andi uvu nderi tindi lora; nanga tsiandi tsivu mangondu-mangondu tsivu tsipinda nderi kavanga.

¹² Misu mandi mavu nderi makunda ametsani va mugula umujamba, bikokosi ubuila bibuili dile bivu buranga va mbura tsiogu.

¹³ Mabanga mandi mavu nderi musaga agumavaru bima bimbunga jiboti. Bilila biandi bivu nderi lisa ajikelumusi mira.

¹⁴ Miogu miandi mivu nderi manguangu malora amamanamugu mamanyi madufunsu duneni. Dunyuru duandi duvu nderi pungi ajimanamugu mamanyi masafira.

¹⁵ Makulu mandi mavu makutu madusiengi duvema amamasumu na tindi lora. Ebagunu na mikongu miLiban, avu sualala nderi musedera.

¹⁶ Munu andi uvu uboti, ka muna muboti gu avu! Banumba baJerusalem anana aguami udurondu aguvu mbatsi ami avu.