Duimbu Adutviolili Nyimbu 3 - La Sainte Bible en Langue Yipunu

Udora edori yiri uromba eyenamuromba (Mugetu)

¹ Mukolu uotsu va tangi ami nyimaromba agu nyirondi na murima ami uotsu; nyimamuromba, nyisamamulaba.

² Nyuretsama; nyutsiengila musiengi, nesi mu mansila nesi o makasa; nyurombanga agu nyirondi na murima ami uotsu. Nyimamuromba, nyisamamulaba.

³ Bagora bamabenguna nami. Nyimabawivula rie: Dumalaba agu nyirondi na murima ami uotsu?

⁴ Yika nyivioyi, nyimalaba agu nyirondi na murima ami uotsu. Nyimamugaanga nyisamamudunda te na nyimamubega o ndagu nguji ami o yibuku yindagu ayi nguji ami amansamina.

⁵ Banumba baJerusalem ndevilianu pesi na diina dibatsiesi na bakabi yiri dugotupupisa.

(Mugetu)

⁶ Anyi eruyili o yiari yikumu nderi nsumbili ajivandumusi mbunga jimira na minongu miotsu misusu mimbungajiboti mibatiyitsi bamuteti?

⁷ Yipoju yiSalomon ayimatsiengulu na magumasiamunu mabaneni baIsrael.

⁸ Botsu bavu na majenga; bejabi utoga divita; mutu mutu na dijenga diandi akunsama utoyisa abobatumuna mukolu.

⁹ Kaga Salomon amakevayisa yipoju na tsimbi tsimiri miLiban.

¹⁰ Amayivayisa makutu malora jivema, yisingumunu, yitindi lora, yitsanunu yitsanda jidufunu duneni, ayimamaruku va gari, na banumba baJerusalem.

¹¹ Banumba baSion, palanu nogengila kaga Salomon eduari dugaba dudiwela adu nguji andi amamuduisa, yilumbu ayi amalabila tindi nsangu.