Duimbu Adutviolili Nyimbu 2 - La Sainte Bible en Langue Yipunu

¹ Menu nyivu felera jikumu jiSaron na lisa jiyibususu.

(Dibaala)

² Nyiina, lisa va gari matsiendi aguami udurondu avu va gari banumba nandi.

(Mugetu)

³ Nana mupoma uvu va gari miri misusu anana aguami udurondu avu va gari bafudu basusu. Nyirondi utsana o tsi yivosi yiandi nyigulu mugangu umilunda miandi dueyi.

⁴ Amambega o mbura aji beji feta; yilimbu yimasonu rie: Durondu.

⁵ Ndisili dipa dirayisan, ndisili poma; ubela nyibeli durondu.

⁶ Muru ami ubi va mugonsi ugogu andi umagetu; akobiyi gogu andi umabaala!

(Dibaala)

⁷ Banumba baJerusalem ndevilianu pesi na diina bibatsiesi na bakabi yiri dugotupupisa va temu etu.

Dibaala uruga eruyi (Mugetu)

⁸ Adina la diufi di-aguami udurondu! Labatianu uruga eruyi, udumuga eyenadumuga mikongu na bikundubuga.

⁹ Ebagunu na tsiesi nesi mundulu kabi. Labatianu avu o nsima yibaga yietu, ugengila egengili va muluta.

¹⁰ Evosi nami rie: Mbatsi ami rambuga, muboti ami ruga!

¹¹ Yitsubi yimavioga; mfula jimasuka, jigemuenoga.

¹² Kembu tsimalabana va butamba, temu uwimbila jimatola, diufi didikunda digulunu o musiru.

¹³ Mifiga mimabenga mfuga jirayisan jimawansa; mbunga tsangu jivandumuyi. Mbatsi ami rambuga, muboti ami ruga!

¹⁴ Aa dikunda diami, guikesuega va gari mamanyi nesi o bisuemunu bimikongu, ndasi yinsi yiagu kulusu diufi diagu, divu diboti yinsi yiagu yivu tindi yiboti.

(Nguji)

¹⁵ Tugaangilianu bitsalala, bitsalala bibivisi nungi tsimfuga tsirayisan; mu mbari tsimawansa.

(Mugetu)

¹⁶ Aguami udurondu avu aguami; menu nyivu aguandi; ebunguli migamba miandi va gari balisa.

¹⁷ Avadupepi dutsisiga duivepili ava bidumbitsi bisakimini, gabuga ombu gami! Nderi tsiesi nesi mundulu kabi aguiyenadumuga o julu tsimikongu amitukakisini.