Duimbu Adutviolili Nyimbu 1 - La Sainte Bible en Langue Yipunu

¹ Duimbu duSalomon aduiviolili nyimbu tsiandi tsisusu.

Mugetu na dibaala Posulu tsi aberondisini (Mugetu)

² Mbumbi, mbumbi! Durondu duagu duilansi uviolila malamu.

³ Miyombu miagu mivu na mbunga jiboti. Diina diagu divu nderi muyombu; la dibandu banumba botsu begurondili.

⁴ Ndundi! Tuwenda mbangu va mosi! Ndeʼ guvu kaga ami mbeyi o yibuku yiagu, tulaba ubueji, tusangila durondu duagu adilansi uviolila malamu. Banumba bana ndunga ugurondanga.

⁵ Nyivu munombi, ka muna kembu ji jivu nami! Nyivu nderi mandagu mamatsanda maKedar nesi tsanda tsipiasu tsiSalomon.

⁶ Banumba baJerusalem, duyakipa upinda uami: nyangu jimanyensa. Baana banguji bami bababaala bamanyoyila, bamapaga mukelisi umanungi marayisan. Nyisamadila temu ukekelisa.

⁷ Ndeʼ agu nyirondi nsinguli mbura aji guibungulili mugamba agu na mbura aji guibisili va muangulu. Dibandu yi nyuguromba va gari migamba mibambatsi bagu?

(Babungulitsi)

⁸ Pa gugedijabi ndeʼ guiviolili bagetu bapuela ubueji, duka dibondu dibindombu, lisila binsambi biagu bebeli na babungulitsi babindombu.

(Dibaala)

⁹ Aa, mbatsi ami guna ubueji dedi na bakabala bamakalu maPharaon.

¹⁰ Mabanga magu mavu maboti va gari misanga kingu agu jivu jiboti jiduisu misanga miperala.

(Babungulitsi)

¹¹ Tuguvayila misanga mitindi lora amiubaku na lora jivema.

(Mugetu)

¹² Ava kaga ami avu o uji feta andi muyombu ami uvandumuga uivandumuyi mbunga jiboti.

¹³ Aguami umurima avu aguami nderi diumba dimira adivu va tulu ami

¹⁴ nderi bisaga bimbunga jiboti bimanungi maEn-Guedi.

(Dibaala)

¹⁵ Ka muna muboti gu, mbatsi ami guvu muboti! Misu magu mavu tindi durondu

(Mugetu)

¹⁶ Mbatsi ami ndeʼ wagu muboti! Ndeʼ guvu uwelimina urondu! Tangi etu jivu tindi jiboti.

¹⁷ Mikambu mindagu etu mivu mitsimbi tsisedera; muansa umavagu na tsimbi tsisipara.