Ruth 3 - La Sainte Bible en Langue Yipunu

Ruth va makulu maBooz

¹ Yilumbu yimosi Noemi amatsingula Ruth rie: Muana, nyilabi yiri diweru dimatola ukunsa diambu diagu yiri gulabanga ubueji.

² Nana guijabili Booz agu gumasala va mosi na basalitsi bandi avu yiburu yietu. Na mukolu egugu osaga orsa va yisagulu yiandi.

³ Buila, nogolila mua matsi noduara biduaru biboti mbana gukamurasuna o mbura aji esayili orsa tsiandi, guyakelasa ombu gandi te na amamana uji nonu.

⁴ Ava owendila uyesilama gukaketa mbura aji oyesilamina. Mbana gukaduta dimfunga diandi noyesilama va makulu mandi. Jaʼ beni ogutsingula adi guvaga.

⁵ Ruth amawaka rie: Nyuvaga motsu ama gumansingula.

⁶ Amawenda o yisagulu na amayevaga motsu ama boji buandi amamutsingula.

⁷ Booz amaji nonu na amalaba tindi nsangu. Mbana amayesilama bebeli na diguki diorsa. Kabogu Ruth amawenda na amaduta dimfunga diandi na buranga, na amayesilama va makulu mandi.

⁸ Ava midi mimukolu Booz amarambuga na amagaangu na goma; amakambulu tindi ukambulu ulaba mugetu va makulu mandi.

⁹ Amawivularie: Ndeʼ lanyi? Ruth amawaka rie: Menu la musalitsi agu Ruth; kumbi dimfunga mu mbari guna musuga umbialila.

¹⁰ Booz amawagula rie: Miula miFumu mibi nagu Ruth! Adi guivayi namunyi diviolili adi gumavaganga na kala. Gugaayenadukanga bafudu nesi bijaga nesi bisina.

¹¹ Guyamuelaba keri, nyuguvayila diotsu adi gukwivula; mu mbari bisi musiengi botsu bejabi yiri guji tindi mugetu.

¹² Dingensa nyina musuga uotsu, tumba vaki mutu ususu osinsa ubambana uviolila jnenu.

¹³ Gukasilama, muna kedi nyuwenda nokunsa diambu diagu. Pa mutu eni ebusi, meʼ beni nyugukunsila motsu. Ne nana silama vana te na kedi.

¹⁴ Kabogu Ruth amasilama va makiilu mandi te na kedi, amasimbuga nesi wisi ukatebuga. Mu mbari Booz amavosa rie: Batu bayajaba yiri ndeju gumakota o yisagulu.

¹⁵ Amamutsingula rie: Vula yijungi yiagu noyiwala. Amayiwala; Booz amapuga bietsu bisiamunu biorsa va julu yionyi. Ruth amayenatsibega; mbana Booz amayenagabuga o musiengi.

¹⁶ Ruth amagabuga ombu boji buandi; Noemi amamuwivula rie: Yika tsienyi? Ruth amamutsingula motsu ama Booz amamuvayila na

¹⁷ amabuela rie: Atsipega bietsu biebibi bisiamunu biorsa na atsivosa rie: Disawelimina yiri gugabuga miogu na miogu ombu boji buagu.

¹⁸ Noemi amawaka rie: Ka sunsa murima, tulelaba nana mambu molabinina, nyijabi yiri Booz agotamba nokunsa diambu; odivaga ne namunyi.