Ruth 2 - La Sainte Bible en Langue Yipunu

Ruth usala esali o nungi Booz

¹ Noemi amaba na yiburu yimulumi andi Elimelek agumaba yisina ayimaba na diduma, diina diandi Booz.

² Yilumbu yimosi Ruth amawivula Noemi rie: Tsie gunsingisa uwenda noyebola orsa atsi bebondusi ava betsonsiyili? Noemi amawagula rie: Nyisingi, wendanga.

³ Kabogu Ruth amawenda uyenabolanga va nsima batsonsiyitsi. Amasunda ulaba yiri nungi aji amayenabolilanga jimaba jiBooz agumaba yiburu yiElimelek.

⁴ Booz amaruyila o Bethleem. Amavosa na basalitsi rie: Dumarambuga? Jogu bamawaka rie: Aa na ndejua.

⁵ Mbana Booz amawivula yivunda yibasalitsi bandi rie: Mugetu eguna, anyi avu?

⁶ Amamuwaka rie: Avu muisi Moab agumaruyila na Noemi o Moab.

⁷ Atsikwivula rie: Nyurungula ubola orsa atsisialulu? Kedi kedi usala esali, yika diweru diedidi mbana amatsana ulevuma mua pesu.

⁸ Booz amatsingula Ruth rie: Guyayenabola o nungi tsisusu na guyagusuga vava, yenabolanga va mosi na basalitsi bami.

⁹ Gukalegengila mbura aji batsonsiyitsi bavu o nungi, ndeʼ wagu gukayenadukanga bagetu abesali. Nyimagandisa bafudu ugulasa maguga. Ava gugululu puila guna musuga unu va mbura aji basalitsi bami benuiningi.

¹⁰ Ruth amakutama va gusu andi na amavosa rie: Dibandu yi guindasili maboti magu, menu aguvu muenyi?

¹¹ Booz amamuwaka rie: Bamansingula motsu ama gumavayila boji buagu ubandila na dufu dumulumi agu. Nyijabi gumasila taji agu na nguji agu na bulongu buagu uruga ombu batu aba gusamalejabanga na kala.

¹² Fumu agugabili miula! Mula uNsambi Israel ubi nagu! Agukelisi mu mbari gutsikesunsa o tsi mangolu mandi.

¹³ Ruth amawaka rie: Diboti dineni! Maboti magu mavu maneni nesi ombu gami agugaa ne dedi na musalitsi agu.

¹⁴ Ava bamavumina midi, Booz amamunengila rie: Ruga uyiji mua mapa metu nomabotiga mu yiamba. Kabogu Ruth amafubana na basalitsi bandi na Booz amamuvega biguji. Amaji na amasuega bimosi.

¹⁵ Mbana amamuerelama uyenabolanga. Booz amalonsa basalitsi bandi rie: Duyamugandisa, ayenabolanga te na va gari enu.

¹⁶ Va julu vana bondusanu tsimosi temu na temu yiri odila tsiwelimina. Duyamulasa yisonyi.

¹⁷ Kabogu Ruth amayenasalanga yilumbu yimfuimbila mbana amakuka atsi amabola. Amadila yietsu yiwelimina yiorsa.

¹⁸ Amatsibega o dimbu na amatsilasa boji buandi. Biguji abi amasuega midi amagabila boji buandi.

¹⁹ Noemi amamuwivula rie: Agunyi gutsiyebolila namunyi? Agunyi gutsiyesalila? Diboti ombu Fumu agumavega mutu eni murima ugulasa ubueji. Kabogu Ruth amamusupulila motsu na amamutsingula rie: Odila nungi eni, diina diandi Booz.

²⁰ Noemi anodigulu amasangila na amagabusila Nsambi diboiti. Amavosa rie: Tsiri yika jetu nagu tuilabi maboti mandi tumba erangimini nesi mulumi agu. Noemi amamutsingula rie: Booz avu yiburu yietu na musuga uotsu uvu nandi.

²¹ Mbana Ruth amabuela rie: Atsindonsa wandi rie: Tsana na basalitsi bami te na bomana dutsonsugu duami duotsu.

²² Noemi amatsingula Ruth rie: Ka muna ubueji gu! Ka vaga nana evosili, gukasalanga na basalitsi bandi babagetu, pa guwenda o nungi jisusu, diurungula uba gulaba diambu.

²³ Kabogu Ruth amasalanga na basalitsi baBooz te na dutsonsugu duorsa na duble dumasuka. Jandi amatsananga na boji buandi.