Romains 8 - La Sainte Bible en Langue Yipunu

Monyu aguiruyili ombu Yinyunyi yiNsambi

¹ Kabogu vagaa mukilu ombu jogu aba-mafubana mirima na Jesus Christ.

² Mu-gaga uYinyunyi yiNsambi aguiveyi monyu ava tuifubinini mirima na Jesus Christ umaku-sula o tsi mugaga umasumu na dufu.

³ Nsambi amavaga ami migaga miMoise misamarungu-la uvaga mu mbari yimumutu yimamitutsa. Amabelisa masumu na yimumutu ava amasi-ndiyila Muana andi agumabonga yimumutu yiri ovagula pagu ugusula masumu.

⁴ Nsambi amadivaga yiri tugomueduka yimumutu tu-mba tuduka Yinyunyi yiandi nodedila dusu-ngugu dumigaga na murima uotsu.

⁵ Mu mbari abeduki yimumutu bekipi yika yimumutu tu-mba abeduki Yinyunyi yiNsambi bekipi yika ama Yinyunyi yiandi ebarumi.

⁶ Aberumu na yimumutu bofu tumba aberumu na Yinyunyi yiandi bana monyu na duvotsu.

⁷ Kabogu ba-vinitsi baNsambi bavu aberumu na yimumutu mu mbari bagededili migaga miNsambi; tsie borungulila?

⁸ Abededili yimumutu bagoru-ngula ulasa Nsambi ubueji.

⁹ Tumba jenu dugeduki yimumutu mu mbari Yinyunyi yiNsambi aji nenu la dibandu duiduki Yinyunyi yiandi. Ogaa na Yinyunyi yiChrist agaa mutu andi.

¹⁰ Tumba pa duma-fubana mirima na Christ dumabokisa nsala tsimasumu na yinyunyi yiandi etsani nenu mu mbari dumasungugu na Nsambi.

¹¹ Pa Yinyu-nyi yiNsambi omarambusa Jesus va gari abafu efubini murima nenu, jandi omarambusa Christ va gari abafu oduvega monyu wandi ava Yinyunyi yiandi efubinini murima nenu.

¹² Kabogu anana baana bataji, tuyamue-duka yimumutu na nsala tsiyionyi, tukavu na yisusu.

¹³ Pa duidukingi yimumutu yienu, du-fu; tumba pa duidukingi Yinyunyi yiNsambi dukavu na mangolu ubokisa bisalu biyimu-mutu na dudila monyu.

¹⁴ Botsu abewendusu na Yinyunyi yiNsambi baji baana baNsambi.

¹⁵ Mu mbari Yinyunyi ayi Nsambi amaduvega agedukotisi o buviga na agedulasi goma tu-mba edunengili baana baNsambi na Yinyunyi yieni etuveyi musuga agugamuga rie: Tata ami!

¹⁶ Yinyunyi yiNsambi efubini murima netu na evosi rie: Duji baana baNsambi.

¹⁷ Tuji baana bandi kabogu otugabila miula nana amalevanginina na batu bandi; va julu vana tuba na dikabu na Christ mu mbari pa tutsoga va mosi nandi tugabulu bundumba va mosi nandi wandi.

Bundumba abulabana

¹⁸ Adi nyilabi adidi rie: Vagaa diambu pa tulaba maguga mu temu ejiji, o gusu tulaba bundumba buandi.

¹⁹ Bisundu biotsu bivu li-yiyi na bivivi nana Nsambi obalasila baana bandi.

²⁰ Bisundu biotsu bigaa na tsongu, adina tsiri diambu diogu tumba dimaba duganu du-Nsambi. Ne nana vamaba ditasa diedidi rie:

²¹ o gusu bisundu biupala o buviga buyimumu-tu unengulungu baana bandi.

²² Tumba tuijabi yiri te na namunyi bisundu biotsu bitsukimi na bilabi maguga nana mugetu elabili ava eburili.

²³ Tsiri yika bisundu na jetu wetu, atuvu na Yinyunyi yiNsambi ayivu pegulu andi jitega na tuitsukimi ava tuivivili Nsambi ogutune-ngila baana bandi, diwendi rie: otupalisa o buviga.

²⁴ Tumagobulu; dionyi yika ditasa tu-mba pa ditasa dimalabana digomueba ditasa. Mu mbari anyi evivi adi elabi na misu?

²⁵ Tu-mba pa tuivivi ditasa tuidivivi na murima usunda.

²⁶ Munongu mosi Yinyunyi yieni etuwa-musi na udeda uetu. Jetu tugejabi usambila nana divu diwelimina; tumba jaʼ beni Yi-nyunyi etusambilili Nsambi tindi usambila.

²⁷ Nsambi oyilabi mirima mibatu egulu Yi-nyunyi yiandi mu mbari Yinyunyi esambilili batu baNsambi nana divu diwelimina na Nsambi.

²⁸ Tuijabi rie: mu motsu Nsambi esungiyi mambu yiri abemurondi na abamanengulu na-ndi bowamusu.

²⁹ Aba Nsambi amalenengila uba abandi abana amabagusunu na Muana andi yiri Muana andi oba tsomi va gari baana bapuela.

³⁰ Kabogu Nsambi amanengila aba amasola; asamabanengila buandi tumba ama-basungiga na amabagabila bundumba buandi wandi.

Durondu duNsambi nana duvu duneni

³¹ Kabogu yi tuvosa? Pa Nsambi avu awetu anyi orungula uba na kueru netu?

³² Asamawi-mina Muana andi tumba amamuvagula pagu mu diambu dijetu botsu! Amatuvega Muana andi; agotuvega motsu masusu?

³³ Anyi ofuengilila abasolu baNsambi? Tsiri mutu! Je Nsambi agebaveyi ndunga?

³⁴ Kabogu anyi orungula ubavega mbela? Tsiri mutu! Je Christ asamafu? Amafu, va julu vana ama-rambuga na etsani va mabaala maNsambi utu-sambilila!

³⁵ Diambu yi diutukakasana na durondu duChrist? Vagaa diambu, ne diguga ne goma ne dikuana ne nsala ne penyi ne yidungu ne dijenga.

³⁶ Nana Bisonu bisonugulu rie: Mu diambu diagu tubokulungu yilumbu na yilumbu na tuirangulu rie: bindombu abibegu o uboku.

³⁷ Mu motsu mana turungula ulunga mu mbari tumafubana mirimana jandi omaturonda.

³⁸ Mu mbari nyijabi, vagaa diambu adiurungula utukakasana na durondu duNsambi aduvu duFumu etu Jesus Christ; ne dufu ne monyu ne biansa ne tumu ne mambu amavu

³⁹ ne mambu amoruga ne mangolu mabisi julu ne mangolu mabisi tsi ne yisundu yiotsu.