Philippiens 2 - La Sainte Bible en Langue Yipunu

Ukesunsa uChrist na buneni buandi

¹ Nsanunu tsienu na Christ tsiduwarisi? Durondu duandi duiduvotsi? Duna dinonga na Yinyuhyi? Duirondisini?

² Kabogu, kokolu tsienu, ndasianu ubueji. Banu na murima umosi na rondasananu.

³ Duyaba na ngusu nesi nsala ukematisa tumba kesunsanu; bamosi va gusu basusu. Duyatasa ne temu mosi yiri duji bawelimina uviolila basusu.

⁴ Duyaromba yika amenu tumba mutu mutu akipi ama mutu ususu.

⁵ Amamaba na Jesus Christ mabi nenu:

⁶ Jandi omaba na yibagunu yiNsambi asamakematisa uba dedi nandi.

⁷ Tumba amakevongula jandi beni na amabonga yibagunu yimusalitsi na amaburu dibaala.

⁸ Anoburu dibaala jandi beni amakevongula na amadedila te na amasinga dufu, dufu adu kurusu.

⁹ La dibandu Nsambi amamumatisila te no mbura aji violili mbura tsiotsu na amamuluga diina adivolili miina motsu,

¹⁰ yiri botsu abavu o julu na abavu va butamba na abavu o tsi butamba bokutama noyitsa diina diJesus,

¹¹ na yiri botsu bosamuna yiri Jesus Christ la Fumu, adina diuba na bundumba ombu Tata Nsambi.

Banu nana bijalala abimonitsi bisi butamba nsila

¹² Kabogu bambatsi bami nana dumalendedila ava nyimabila nenu vaganganu munongu mosi ava nyivu vala nenu. Salanganu na goma noregama udugusu dugobutsu duenu.

¹³ Mu mbari Nsambi esalingi va gari enu yiri duba na nsala udugusu duganu duandi nomudedila mu motsu.

¹⁴ Vaganu bisalu biotsu tsiri na minyinga vo utsikadana yiri dugoba na nsiembu vo muinsi.

¹⁵ Banu baana baNsambi badugu abagaa na mbela ava betsanini va gari bisi butamba buebubu. Nana bambuelili belulili o julu anana wandi vengu dulasa yijalala

¹⁶ ava duisamunini Musamu umonyu. Pa duivayi nana nyurungula usangila mu yilumbu yiChrist. Diwendi rie: Ngolabu nderi yisalu yiami yimaba kulini.

¹⁷ Diurungula uba yiri malongu mami mowitulu muensili aguba nderi pagu ajimawakusulu na yitu ombu Nsambi. Vagaa diambu, nyulaba ubueji va mosi nenu.

¹⁸ Munongu mosi jenu wenu labanu nsangu nami.

Timothee na Epaphrodite

¹⁹ Pa Nsambi erondi nyusindiga Timothee namapapa ombu genu yiri nyuwarusu ava nyugululu misamu mienu.

²⁰ Ngaa na mutu ususu aguidurondi nana menu nyidurondili.

²¹ Botsu basusu berondi amogu tsiri ama Jesus Christ.

²² Jenu beni duijabi nana Timothee avu awelimina na nana ekelisili nderi nyiji taji andi mu diambu diMusamu Uboti.

²³ Kabogu pa mami motsu mowenda buranga, nyumusindiga ombu genu namapapa.

²⁴ Na pa Nsambi erondi na pa Fumu okwamusa menu wami nyudulaba namapapa.

²⁵ Nyitasi divu diwelimina udugabusila muana taji etu Epaphrodite wandi. Jandi aji yilumbi ayi dumatindila ukwamusa na va julu vana aji mbatsi ajisali nami.

²⁶ Ana nsala jineni udulaba, elabi murima utsira mu mbari dumagulu yiri amabela.

²⁷ Dingensa amabela diambu, bebeli nofu tumba Nsambi amamulasa yingeba na menu wami mbe tsi nana mbe nyimalaba maguga va julu maguga.

²⁸ La dibandu ngotsikadana umusindiga ombu genu yiri dulaba ubueji ava dumuelabinina na yiri menu wami ngomueba na munyongu mu dionyi.

²⁹ Kabogu mudilianu na nsangu na ubueji! Munongu andi avu awelimina ugobusu.

³⁰ Amabufu mu diambu diami na diChrist; amadugusu motsu ama jenu dusamarungula umanisila.