Osee 4 - La Sainte Bible en Langue YipunuBunsonsi abu Nsambi etabulili batu bandi 1 BaIsrael guluanu mambu maFumu! Fumu ana musosi na bisi bulongu; ngensa jigatsi, yingeba yigatsi na bulongu buotsu bugejabi menu Nsambi. 2 Vavu yika ndunsulu na mfurulu na uboka na udaga na bumbembu. Besalisi dikasi na bukongu na bukongu. 3 La dibandu bulongu buotsu bunyongilanga na botsu abetsani muna bokuduga; nesi bibulu nesi batsoli nesi nyama tsimubu tsiutsiemuga. Diambu dibavagulitsi bapagu 4 Tumba ne mutu mosi ayatumuna paga nesi mutu mosi ayawaka mu mbari batu bagu bavu na bukidi utsundisa muvagulitsi upagu. 5 Ndeʼ guitsimbungu nyangu mubiyitsi etsimbu va mosi nagu mukolu, mbana nyubunga nguji agu Israel. 6 Batu bami bamabungu mu mbari bagenjabi. Ndeʼ gumabusa unjaba kabogu nyugubusa na gupatulu buvagulitsi bupagu. Ndeʼ gumalibana migaga miNsambi agu, meʼ wami nyulibana baana bagu. 7 Nana bavagulitsi bapagu bamafunina anana masumu mamafunina; bamasopana meʼ aguvu bundumba buogu na bakosi bansoruru. 8 Bekusuyili masumu mabatu bami; kabogu bebarombisi uvaganga mabi. 9 Nana muvagulitsi upagu avu anana wandi batu bobila. Nyubakilisa mu diambu dibifu biogu na nyubasaka dedi na bisalu biogu. 10 Bojanganga ne nana bagogukuru, bovaganga bumbembu ne nana bagofunanga. Nyiina, bamabusa menu aguvu Fumu uvaganga buvuyisa. 11 Bumbembu na malamu magala na malamu madisoga bibatsiemusi diela. 12 Batu bami besambili bakosi bamuiri, dupangu duogu duibabiyili; nsala bumbembu jibapembusi nsila. Bevayingi bumbembu te na bamakakana na Nsambi ogu. 13 Bevaguli pagu va julu tsimikongu na benyensi bima bimbunga jiboti va julu tsibikundubuga. Bavu o tsi misena nesi mipali na miterabeta amivu na yivosi yiboti. La dibandu baana bogu babagetu bevayingi bumbembu nesi baboji bogu bavu bimbembu. 14 Ngokilisa baana benu babagetu mu mbari bavu bimbembu nesi baboji benu mu mbari bavu bimbembu. Nyudukilisa mu mbari duipembusi baana babagetu nsila, uyevagula pagu va mosi na bimbembu bimandagu mabansambi. Nongu jivosi rie: Biduka bibatu uwenda bewendi o dubungu. 15 Aa Israel, pa gukevega uvaganga bumbembu, Juda ayakota muna! Duyawenda o Guilgal nesi o Beth-Aven na duyaleva rie: Fumu ejabi. 16 Mu mbari Israel amaba mumbini nderi muana ngombi agugegaru ulonsu. Dibandu yi Fumu obalisilanga o kumu jineni nderi bindombu bavu? 17 BaEfraim bamafubana na bakosi. 18 Badundi, bayenaviosulilanga kulini tsiogu nesi bumbembu buogu. Basefu bogu bagelabi ne yisonyi. 19 Yimbongila yiubanangula, mbana bolaba yisonyi na pagu tsiogu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon