Osee 11 - La Sainte Bible en Langue Yipunu

Durondu duNsambi

¹ Fumu evosi rie: Ava Israel amabila mufudu nyimamurondanga na nyimamupalisa o Egypte.

² Tumba nyinomunengilanga amakakananga nami; amavagulilanga Baal pagu na amavagulila bakosi bima bimbunga jiboti.

³ La menu agumasungiga taka tsitega tsiEfraim na nyimamugaanga miogu ne nana asamalaba yiri nyimamubelusa.

⁴ Nyimamuduta ombu garni na mikudu midurondu. Nyimaba ombu gandi nderi taji agumanangula muana andi ugeyi. Nyimamugabila biguji.

⁵ BaIsrael bagomuegabuga o bulongu buEgypte; tumba muisi Assyrie oba kaga ogu mu mbari bamambusa.

⁶ Divita diusundila ulabana o misiengi miogu adiubabunga nesi usielasana bawarisitsi bogu mu diambu dikanu atsi baIsrael bamagana.

⁷ Batu bami belabi ubueji ukakana nami; diuleba nyimabalembiyila ukengila tumba ne mutu mosi va gari ogu asamanangula misu.

⁸ Efraim, diambu yi nyuguvayila? Israel, nyurungula uguwakisa? Nyuguvayila dedi mosi na Adma? Nyuguvayila dedi mosi na Seboim? Minima ami ubuka uibuki. Ka muna durondu du nyidurondi!

⁹ Ngolasa kabu ami jineni ngerondi ubunga Efraim; menu ngaa mutu nyivu Nsambi agu; ombu gagu Efraim nyivu Nsambi agu; ngoruga ugulasa kabu ami.

¹⁰ Bakoli bodukanga Fumu agugumbanga nderi yimbungu, ogumbilanga baana bandi babaala aboruyila noregama o yiari ayi wisi ewendisini.

¹¹ Boruyila o Egypte wandi nderi yinombu yibatsoli, nesi o bulongu buAssyrie nderi yinombu yimabembi. Fumu evosi rie: Nyubagabusa o biari biogu.