Osee 10 - La Sainte Bible en Langue Yipunu

Disukusulu dimuyitsa na dibufumu

¹ BaIsrael bamaba nderi mfuga ajiburi mirayisan mipuela. Nana milunda mimafunina anana bamafunisila binyensulu bipagu; nana bulongu buogu bumabila na digumba anana bamabuejisila bitumba.

² Mirima miogu mivu yiari na yiari; bowarila mukilu. Fumu opansa binyensulu biogu bipagu nesi bitumba biogu.

³ Namapapa bovosa rie: Tugaa na kaga yiotsu ayi tugedumini Fumu; kaga, yi orungula utuvayila?

⁴ Bevosi mambu makulini nesi pesi tsimfurulu ava bevanginini pangini. Musuga uFumu uvu ombu gogu nderi yikuji o nungi.

⁵ Bisi Samarie boyitsa muana ngombi ulora o Beth-Aven. Batu na bavagulitsi bapagu bandi boduara yifuila. Bogamuganga ava bundumba bu-uonyi butsiemuyila va gari ogu.

⁶ Kosi eni jiubegu O Assyrie, jiuvegu mulendu ombu kaga Jareb. Efraim ogaangu na yisonyi na baIsrael wandi bolaba yisonyi na kanu tsiogu.

⁷ Samarie bumabungu na kaga buonyi avu nderi difuitsa va julu mamba.

⁸ Mbura tsiduyitsu atsi baIsrael bamavayilanga masumu tsimabungu; matsiendi na kengitsi biubenda va binyensulu biogu bipagu. Botsingula mikongu rie: Tukubiyianu! Tuvikianu!

BaIsrael botsonsiga abi bamavara

⁹ Ubanda va temu jiGuibea jenu baIsrael dumavaga masumu! Dusamavinsa kingu! Digaa diwelimina yiri divita diugaanga bavayitsi bamabi o Guibea?

¹⁰ Fumu evosi rie: Nyubakilisa nana nyirondili. Batu bogukama utoga nogu, ubakilisa mu diambu dimabi mogu mapuela.

¹¹ Efraim avu nderi muana ngombi agumarelugu aguirondi utsiarila ble, tumba nyubambana nandi; nyunangusa Efraim yilala, Juda ofutsanga na Israel osalisa tsiengu.

¹² Kevarilanu dusungugu ketsonsiyilanu yingeba, sagulanu nungi jigona! Temu ejiji la temu uromba Fumu. Oruga nderi mfula, oduwitilila dugobutsu.

¹³ Jenu adumasala mabi, tsonsiganu mabi jianu milunda mimfurulu. Israel ndeʼ guvayila amagu yitu nesi dutalu dubagora bagu bamangolu.

¹⁴ La dibandu vobila kimbu jineni va gari batu bagu na bivaga biagu biotsu biupansu. Bokilusu dedi mosi na Bet-Arbel ava kaga Chaiman amagutumunina mu yilumbu yidivita ayi banguji bamagesumunu va mosi na baana bogu.

¹⁵ Fumu evosi rie: Jenu baIsrael anana nyuduvayila mu diambu dimbivulu tsienu tsineni. Ava wisi uitebuyili kaga jiIsrael okebungulu.