Nyimbu 96 - La Sainte Bible en Langue YipunuDUIMBU Duimbu dugona uwimbilila Fumu oyiruyi (Gengila 1 Mis 16.23-33 ) 1 Wimbililanu Fumu duimbu dugona! Bisi butamba botsu, wimbilanu Fumu! 2 Wimbilanu nyimbu uyitsa Fumu, dodisanu diina diandi. Samunanu dugobutsu duandi yilumbu na yilumbu. 3 Wimbilanganu bundumba buandi ombu batu botsu, Vosanganu maboti mandi ombu batu botsu! 4 Fumu avu muneni, avu tindi uwelimina uyitsu. 5 Eviolili bansambi botsu diduma. Bansambi botsu babatu bagaa na tsongu, tumba Fumu amavaga julu. 6 Avu na digoba na bundumba; mangolu na kembu bibasi Mbura andi. 7 Jenu batu botsu, veganu duyitsu ombu Fumu, Jabisanu bundumba buandi. 8 Samunanu bundumba buandi; kotanu o ndombili tsiMbura andi, Veganu miensili mienu ombu gandi! 9 Gudamanu va gusu Fumu ava elasili bunsambi buandi. Mureyiminianu jenu batu botsu. 10 Tsingulanu bisi malongu motsu rie: Fumu avu kaga, bulongu bumawara, bugopupusu. Fumu etabulili batu bunsonsi na dusungugu. 11 Bisi julu sangilanu, bisi butamba sangilanganu wandi, mubu uigumbi na biotsu abivu muna! 12 Nungi na biotsu abivu muna bisangili, miri mimusiru misangili va gusu Fumu! 13 Mu mbari uruga eruyi, uyitabulila batu bunsonsi! Otabulila bulongu bunsonsi na dusungugu, otabulila bisi malongu bunsonsi; agekubuli pangini tsiandi. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon