Nyimbu 95 - La Sainte Bible en Langue Yipunu

DUIMBU Temu ukelasa va gusu Fumu

¹ Ruganu, tuwimbilianu na nsangu uyitsaFumu! Tuyitsianu aguvu Dimanyi dietu nesi Mugobutsi etu.

² Tʼwendianu va gusu andi na nyimbu tsiduyitsu, Tuwimbilianu nyimbu umuyitsa!

³ Fumu avu Nsambi Aguvu Uneni, avu Kaga jineni ajiviolili bansambi botsu.

⁴ Nesi ndonga tsibutamba tsivu va dikaka diandi nesi julu tsimikongu atsiandi.

⁵ Nesi mubu aguandi, jandi amagusunga; butamba wandi amasunda na mangolu mandi.

⁶ Tʼwendianu, tumuyitsianu nogudama, tukutama va gusu Fumu aguvu Musunditsi etu!

⁷ Avu Nsambi etu, jetu tuvu batu bandi aba ebunguli, tuvu mugamba agu ewendisi.

⁸ Pa duigulu diufi diandi namunyi, duyagalisa mirima nana bakaga benu bamagalisa mirima o Meriba na nana bamavayila o Massa ava bamabila o kumu.

⁹ Aguna bamambangila na bamakweliyila diuleba bamalaba bisalu biami.

¹⁰ Mu magumana mabilima nyimatopulu bifu bibi bidukula dueni, mbana nyimavosa rie: Batu bebaba bavu mimbini, bebusi ukipa bifu biami.

¹¹ Va julu vana nyimagana kaka na kabu ami rie: Tsatsabi bagokota o mbura aji nyimabakunsila yivumu!